EDITORYAL - Kabalikat sa Pagtuturo Act

Usa ka maayong balita para sa mga public school teachers sa nasud kun hingpit nga mapasar ang balaudnong Kabalikat sa Pagtuturo Act nga nagtinguhang doblehon ang kasamtangang teaching supplies allowance sa mga magtutudlo.

Matud pa nga gikatakdang pirmahan kagahapon ni Presidente Ferdinand Marcos Jr. ang maong balaudnon nga diin hatagan ang matag magtutudlo og tag P10 mil para sa duna silay ipalit og teaching supplies kada tuig.

Sa pagkakaron ang mga magtutudlo aduna lamang P5 mil nga allowance para niini, apan tungod sa kamahal na karon sa mga school supplies, usahay ang mga magtutudlo mokuot sa kaugalingong bulsa aron makapalit niining galamiton para sa ilang pagtudlo.

Pila ra man intawon ang sweldo sa mga magtutudlo, naa pay uban nadestino sa mga hilit kaayong mga dapit nga mahal ang plete matag adlaw. Unsa nalay mabilin para sa ilang pamilya kun mahurot sa pleti, teaching supplies ug uban pang galastuhon.

Dili man sab basta-basta pwedeng mangayo ang mga magtutudlo sa mga tinun-an o sa mga ginakanan para ipalit og dugang teaching supplies sama anang chalk, bondpapers, Crayola, mga kartolina, ug daghan pang uban.

Usa ang Sugbuanong Kongresista sa South District nga si Edu Rama sa mga author sa maong balaudnon nga gikatakdang ipatuman karong sunod nga school year 2024-2025.

Kaning teaching supplies gawas sa mga libro, iya man gyud unta kini nga gastos sa gobiyerno partikular na sa DepED, apan tungod lagi nihit man sab kaayo ang budget, ang mga magtutudlo nalang sab maoy moako sa kuwang nga palitunon o ba kaha ipasa ngadto sa mga ginikanan.

Pinaagi niini, magaan-gaan na unya sa bulsa sa mga magtutudlo ang ilang gastoson kada tuig ug sa samang higayon, makatabang kini og dako para sa pagtuon sa ilang mga estudyante.