EDITORYAL — 4Ps beneficiaries ‘di na mahihirapan
TINATAYANG 4.4 milyon ang mga pamilyang benepisyaryo ng Pantawid Pamilyang Pilipino Program (4Ps). Sila ‘yung mga pamilyang kabilang sa pinakamahihirap na sector ng lipunan—mga walang-wala. Ang 4Ps ay may taunang budget na P200 bilyon.
Noong nakaraang taon, 100,000 na pamilyang benepisyaryo ng 4Ps ang inalis na sa listahan ng Department of Social Welfare and Development (DSWD). Nag-graduate na ang karamihan sa kanila samantalang ang iba ay inalis dahil natuklasan ng DSWD na isinasangla ang kanilang ATMs sa mga loan sharks at nabaon sila sa utang.
Noong 2022, may mga report na natanggap ang DSWD na kahit nakatapos o nag-graduate na ang benepisyaryong pamilya, patuloy pa rin silang tumatanggap at hindi nire-report ang kanilang totoong sitwasyon. Natuklasan ng DSWD na mahigit 1-milyon ang nagsasamantala sa programa. Inaabuso at hindi tumutupad sa pinag-uutos ng DSWD.
Ayon kay DSWD Sec. Rex Gatchalian, patuloy ang kanilang paglilinis sa listahan ng mga 4Ps beneficiaries at tinitiyak na nasasala nilang mabuti ang mga pamilyang tumatanggap ng ayuda.
Isa rin sa magandang sinabi ng DSWD ay ang pagpapagaan sa pagtanggap ng ayuda ng 4Ps beneficiaries. Idaraan na umano sa e-wallet ang pagtanggap sa ayuda. Hindi na umano pipila sa banko ang beneficiaries para makuha ang ayuda.
Ayon kay DSWD Asst. Secretary for 4Ps and National Household Targeting System Marites Maristela, layon nilang maging digital financial literacy ang 4Ps beneficiaries. Nakikipag-ugnayan na umano sila sa GCash, Maya, Land Bank of the Philippines at BPI Foundation. Kamakailan, inilunsad ng DSWD ang “e-PANALO ang Kinabukasan” program.
Ayon pa kay Maristela, bukod sa mabilis na matatanggap ng beneficiaries ang ayuda, hindi na rin mababawasan pa ang kanilang mga matatanggap. Kadalasang pumipila sa ATMs ang mga benepisyaryo na malaking abala sa mga ito.
Sinimulan ang 4Ps noong 2007 sa panahon ni President Gloria Macapagal-Arroyo na ang layunin ay mapabuti ang kalusugan, nutrisyon at makakamit ng edukasyon ang mahihirap na pamilya.
Ipagpatuloy ng DSWD ang maayos na pamamahagi ng ayuda sa mga mahihirap. paglilinis. Ipamulat din naman nila sa mga pamilya na gamitin sa maayos, wasto at pagpapaunlad sa sarili ang tinatanggap na ayuda.
- Latest
