Tensiyon sa Middle East

Subra na sa usa ka tuig ug tunga ang gubat tali sa Russia ug Ukraine ug walay timailhan nga molurang kini. Gani, mas nagkainit na hinuon ang maong kagubot nga misangpot ngadto sa dakong kadaut sa duha ka nasud, ilabina na sa Ukraine.

Apan samtang mipilit atong atensiyon sa dugoong kumbati didto sa Russia ug Ukraine, kalit lang miulbo ang tensiyon didto sa Tungatungang Silangan, tali sa militanteng Hamas sa Palistine ug sa silingan nga nasud sa Israel.

Nag-ugat ang bag-ong kagubot sa dihang gisulong sa Hamas ang pipila ka lugar sa Israel ug walay habas nga gipamatay ang gatusan ka sibilyan, gilangkoban sa mga bata, ug mibihag usab sa gatusan ka Israeli. Mao kadto ang labing ngilngig nga pag-atake sa Hamas sulod sa Israel.

Mikabat sa 1,400 ka kinabuhi ang nakalas. Ug sa dihang mibalos usab ang Israel pagpaulan og mga bomba ngadto sa Gaza, ang teritoryo sa Hamas, daghan usab ang nangamatay, kadaghanan mga sibilyan kinsa napagan gumikan kay sa mga populated areas man nagtago ang mga militanteng Hamas.

Karon, saad sa Israel nga puohon na gayud ang Hamas nga ilang ginganlan og mga terorista. Kini human sa grabe nga pagpangatake sa mga militante sa maong nasud nga giingong maoy labing grabe sa kasaysayan niini, ilabina human sa Holocaust.

Gimando na usab sa Israel ang paglalin sa mga sibilyan aron nga makapadayon kini sa ground operation batok sa Hamas ug ubang militanteng grupo nga anaa karon nagluklok sa mga underground tunnel sa mga komunidad.

Tungod sa saad sa Israel nga bungkagon gayud niini ang Hamas, gikahadlokan nga mapulbos gayud ang Palestina sa opensiba unya sa Israel. Mao nang nanawagan karon ang international community nga dili ipadayon ang ground operation sa Israel ug ipatigbabaw una ang ceasefire.

Makapanimbawot sa balahibo nga hunahunaon ang pag-ulbo unya sa dakong gubat sa Middle East, ilabina nga gikahadlokan nga moapil ang ubang mga Muslim countries batok sa Israel. Sinyales na ba kini sa gitagnang World War III? Hinuon, mag-ampo lamang kita nga dili.