Himatyon na ba ang pag-uma o farming?

Kong walay mag--uuma wala usab kitay makaon karon, busa angayan lang nga palig-onon ang sektor sa agrikultura aron mabuhi ang mga tawo nga nagsalig kanila. Apan unsaon man pagpalig-on kong inanay na nga nahanaw ang interest sa mga tawo sa pagtikad sa yuta ilabi na ang mga bag-ong henerasyon?

Kini ang dakong hagit karon kong unsaon sa pagsugakod ang pag-uma sa atong nasud kay mismo ang ang atong gobiyerno wala man maayo mohatag og suporta ngadto sa mga mag-uuma sa tinuod lang hilabihan ka mahal ang mga abuno ug kemikal nga gamiton nila ug hilabihan ka barato ang palit sa ilang mga produkto.

Ang ingon niini nga sitwasyon ang makapasamot og discourage sa mga tawo nga dili nalang magbuwad sa init kay magtikad sa yuta kay maputos ra man sa utang. Tinood kini kay base sa akong kasinatian kay nagtubo man gyud ko sa umahan, wala magsalig ang akong mga ginikanan sa abot sa humayan kon dili nagsalig sa utang.

Kini ang hinungdan nga nakapanganti ko kaniadto nga mag eskwela aron kong makatapos ko makatrabaho og opisina ug dili na mabuwad sa init nga magtikad sa yuta unya maguwang ra sa pangayo ang presyo sa abot sa umahan, ug daghan pa kaayo og problema sa panahon ug sa peste nga moatake sa mga pananom.

Kaniadto kini nga mindset kay karon nako na-appreciate ang kamahinungdanon sa papel sa mga mag-uuma nga maoy tinubdan sa atong gikaon kay matud pa rice is life basta bisan unsa nga produkto sa umahan mag mugna gyud kini og kinabuhi sa mga tawo nga nagsalig sa pagkaon.

Ang pangutana karon kong unsaon pagdasig ang mga tawo nga motutok gyud sa umahan kay kasagaran sa uban gustong mo-abroad kay aron lagi mahaw-as sa kalisod samtang ang uban magnegosyo o bisan unsa nga panginabuhian basta malikay lang sa pagtikad sa yuta.

Unta tinud-on sa gobiyerno ang paghatag kanila og pagtagad dili lang kutob sa pulong kon dili ipakita gyud sa buhat nga mabatyagan sa mga mag-uuma nga pinangga sila aron sa ingon maengganyo ang mga tawo nga mobalik sa pagtikad sa umahan.

Minstras aduna pay mga mag uuma nga motikad sa yuta dili kita mabalaka nga mahutdan og pagkaon busa haum ug angayan lang nga ilhon ug pasidunggan ang ilang natampo sa paglambo sa nasud sama sa gihimong Gawad Pasasalamat nga gihimo sa Department of Agriculture aron ipakita nga wala hikalimte ang mga tawo nga naningkamot nga adunay makaon ang katawhan.

Unta dili lang kutob sa award kon dili mahatagan ug masustinehan ang ayudad alang kanila.