Bragging rights ni Quiboloy

Gimando sa Korte Suprema nga ibalhin ang pagdungog sa mga kaso ni Apollo Quiboloy nga child abuse ug human trafficking gikan sa Davao City ngadto sa Quezon City aron kuno malikayan ang pagkadiskaril sa hustisya tungod kay dako ang impluwensa sa akusado’ng religious leader didto sa Davao.  Kon barugan gayod ni Quiboloy ang iyang pagpangangkon nga siya anak sa diyos, dili na lang tingale niya kwestiyonon ang pagbalhin sa venue sa hearing.  Si Ginoong Hesukristo bitaw, samtang gitaral pa siya, gibalhin-balhin man siya gikan sa lugar ni Caiphas dayon ngadto sa lugar ni Pilato.  May’na lang makapanghambog si Quiboloy nga nahisama ang dagan sa iyang kinabuhi sa kang Kristo.  Wa gaba-eee!

Nahinulong sa trabaho

Gipaubos sa Ombudsman og unom ka buwan nga preventive suspension si Bohol Governor Erico Aumentado ug ubang 68 ka opisyales samtang ipahigayon ang imbestigasyon sa pagtukod og resort/hotel sa Chocolate Hills sa lungsod sa Carmen, Bohol.  Mora’g nagkakugihan man karon ang Ombudsman.  Hinaut nga hustisya ug dili politika ang hinungdan ni’ng ilang kakugihan.  Ni’ng kapaspas sa aksyon sa Ombudsan, dili na haum kanila ang komedya nga “Ganahan ug nahinulong kaayo sila sa ilang trabaho mao nga bisan pila ka oras, mahimo ra silang magpunay’g lingkod samtang nagsud-ong sa nagtapun-og nga trabaho”. Muleeeng!

Nagpaabot og suborno

Gisuspenso sa Korte Suprema si Pasay City Judge Alberto Cansino kauban sa iyang acting branch clerk of court tungod sa alegasyon nga midawat sila’g suborno nga balor og P6 milyones  bugti sa pabor nga desisyon sa usa ka civil case.   Kuyanap man ang paghatag og suborno sa mga opisyales sa apan ngilo paminawon kon huwes ang mahilambigit.  Mora’g nahulagway ni’ng kahimtanga ang panahom nga, “Katunga sa mga awtoridad nagpaabot nga tunolan sila nimo og suborno ug katunga usab kanila nagpaabot nga tunolan nimo og suborn aron gamiton pagbalhog kanimo sa bilanggoan.”  Madahaan!

Nasudnon’g pansayan

Gikanselar ni Cebu City Acting Mayor Raymond Alvin Garcia ang procurement process sa P18 milyones nga kantidad nga pag-abang sa mga portalets ug portabaths nga gamiton unta sa umaabot Palarong Pambansa 2024. Daghan ang mi-abiba ni’ng gihimo nga pagkanselar tungod kay mahal da kuno ug dili makatarunganon ang kantidad nga gigahin alang sa pag-abang sa maong mga portalets ug portabaths.  Kon wala pa kanselaha ang maong pag-abang sa mga portalets, tungod sa kamahal sa abang niini, angayan kini pagatawgon nga “Nasudno’ng Pansayan.”  Fezteleern!

Executive functions sa konsehal

Gitahasan ni Cebu City Acting Mayor Raymond Alvin Garcia ang mga konsehal sa dakbayan nga mo-akto isip mga overseer sa pipila ka departamento sa City Hall. Tuyo sa acting mayor nga  matabangan siya sa pagpatuman sa mga kaakohan isip acting mayor.  Ni’ng pagtahas sa mga konsehal og mga executive functions, hinaut nga dili maparehas sa estorya sa unggoy nga sa kasibot nga tabangan niya ang isda tungod sa pagtuo nga kini malumos kay naglangoy man sugat sa sulog, iya kining gihaw-as sa tubig.  Pwerting pataya sa isda.  Pagkatoytoy!