Pilipinas nagakatun-as

Ang pagbag-o sa bloody war on drugs ni former Presidente Rodrigo Roa Duterte (FPRRD) ngadto sa bloodless war ni karon Pangulo Bongbong Marcos (PBBM); ang pagguba sa karong adminstrasiyon sa kanhi mahigalaong relasiyon sa China ug Pilipinas nga gibilin ni FPRRD ngadto kang PBBM; ang pagpanangtang sa mga maayo-ligdong opisyales ug gipulihag mga korap; ang paghigot sa liog sa mga kongresista-senadores gamit ang salapi ug gahom, diin  kutob sa mosupak sa unsay gusto sa agawon, adunay daotang mahitabo, kini igo nang makatug-an unsang klaseha sa pangagamhanan ang anaa kanato karon?

Sa nagsunod upat ka PDEA Leaks Senate hearing, dagha’g nasayran ang nagmabinantayong katilingban. Bisan gideklarar ni Senador Ronald ‘Bato’ dela Rosa nga ang nahuptang PDEA Pre-Operations Report ni kanhi PDEA Agent Jonathan Morales, existing and authentic, diin naapil ang ngalan ni PBBM sa mga dakpononong drugs users, gusto pa kining takpan ni Senador Jinggoy Estrada, kinsa pinaagi sa pasukosuko, dali ra nakahusga nga peke kini ug bakakon kuno si Sir Jonathan. 

Usab, pinaagi sa CCTV footage ug panagkukabildo nga madungog sa mga nanag-video call, milutaw nga ubos sa direksiyon ni LAM (Liza Araneta Marcos), gisugo ang usa ka James Kumar pagpangitag paagi nga mapahilom si Sir Jonathan pinaagi sa pag-bribe o pagpanghadlok.

Mao nga gikontak ni Kumar ang usa ka Pikoy Santiago, kinsa midangop-tawag kang former PDEA Agent Romeo Enriquez, suod higala ni Sir Jonathan aron maoy personal mohatod sa nahisgotang negosasiyon. Apan lig-og baroganan si Sir Jonathan. Dili mapalit sa lotto jackpot ang moralidad. Bisag nakadungog nga mahimo siyang ipapatay ni LAM nga ipaagi lag disgrasiya-sakit sa kasingkasing, wala gyod sila makadulot kaniya.

Human sa upat ka hearing, gitaktak si Senador Migs Zubiri sa iyang pagka-Senate president ug gipulihan ni Senador Chiz Escudero. Nahimong emosiyonal ang iyang farewell speech. Wala kapugngi ang paghilak samtang nagpasalamat sa iyang gituohang mga higala, kinsa mao ra poy mipatalsik-traydor kaniya.

Ug masulob-ong mitug-an sa hinungdan: “I failed to follow instructions from the powers that be.” Nga mokonektar sa mga panghitabo’g mensaheng gipasundayag sa CCTV footage.

Luoy na ang Pilipinas. Nahisama sa tigbayong gisigehag ukit sa mga anayng hangol. Nagakatun-as na intawon. Unya, mangiyugpos ka ba lang gihapon, higala?