Alkanseng Cebu City

Ang Tokagawa Global Corporation nga gitugyanan sa Cebu City government pagpangolekta sa parking fees sa mga tag-iya’g sakyanan nga mo-park daplin sa mga karsada, daw sa gihatagan og higayon nga makanegosyo pinaagi sa karsada nga iya sa kagamhanan.

Wa gyud mosantop sa hunahuna sa mga opisyal nga nabentahaan na gani ang Cebu City government sa pagbahinay sa makolekta gikan sa parking fees, kay tiaw mo nga 22 percent ra sa gross income maoy mahipunta sa siyudad, ug ang 78 percent maangkon sa Tokagawa?

Sa ato pa, sa matag P20 nga bayad sa usa ka motorista nga moparking sa usa ka oras, ang siyudad sa Sugbo makabahin lang og kapin sa P4, ug ang subra sa P15 mahipunta sa Tokagawa.

Nganong ingon man niana kadako ang bahin nga mahipunta sa Tokagawa? Duna ba sila’y mga ekipo/makinarya sama sa mga parking equipment nga gibutang diha sa mga karsada?

Igo ra nila nga gibadlisan pinaagi sa pintal ang mga karsada nga anha maka-park ang mga sakyanan, ug sagad gani sa mga parking areas nangapapas na ang mga pintal.

Unya, miingon ang Tokagawa nga duna lay 2,667 ka parking slots nga ilang gidumala dinhi sa siyudad. Tell that to the dead marines.

Sama sa Sanciangko Street atubangan sa Cebu Coliseum, base sa ilang lista, duna lang kuno’y 65 ka slots para sa mga motor, apan dihang gisusi nako, kapin sa 100 ka motor ang namarking.

Karon, apilon na sab nila ang Domingo nga sila mangolekta, ug iabot na ngadto sa alas 9 sa gabii. Pangutana, pila man ang makuha nga bahin sa siyudad?

Nganong mangolekta man dayon ang Tokagawa nga wa pa mahimoi og “amendment” ang Joint Venture Contract? Ug nganong gitugotan man sab kini sa mga opisyal?

* * *

Nindot kaayo ang epekto sa Tropical Depression Ablong dinhi sa Sugbo, ug tingali sa uban usab nga mga lugar. Nakatigum ta og tubig gikan sa uwan.

Matud ni Engr. Joffrey Hapitan, ang chairman sa JE Hydro nga maoy supplier og tubig sa MCWD, mibalik na nga naka-supply na sila og 20 million liters kada adlaw.

Ang JE Hydro nagkuha og limpyong tubig gikan sa sapa sa Barangay Lusaran, Cebu City, ilang gi-process ug ang limpyo nga tubig, gisuplay ngadto sa MCWD.

Dako kaayo ang pagpasalamat sa MCWD ngadto sa JE Hydro kay kon wa pa ang tubig gikan sa Lusaran, dako kaayo ang problema sa MCWD.

Mao nga ang bati nga panahon, usahay makahatag usab og kaayohan sa kadaghanan. Makahatag kini og kabugnaw, ug mabuhi ang atong mga tanom ug ang kakahoyan.