Panahon na

Usa ka maayong kalamboan ang pagkahiuli karon sa maayong kabubut-on taliwala sa kagamhanan sa dakbayan sa Sugbo ug liderato sa Cebu Ports Authority human sa masalimuot nga relasyon sulod sa pipila ka tuig.

Sa niaging Biyernes, nakigtagbo si acting mayor Raymond Garcia kang CPA general manager Francisco Comendador III aron paghisgot sa sitwasyon sa mga kabtangan nga giilogan sa dakbayan ug CPA sa dugay nang panahon.

Akong nasabtan sa maong panagtigom nga magkahiusa ang duha ka kampo pagpalambo sa maong mga propriedad, ilabina ang Compaña Maritima ug kasikbit nga mga lugar nga kabahin sa Carbon Market Redevelopment Project.

Usa sa napagan sa gubot tali sa siyudad ug CPA mao ang proyekto pag-modernize sa Carbon Public Market, ang labing dako nga pampublikong merkado sa dakbayan. Kini tungod kay adunay porsiyon sa lugar nga ilalum sa proyekto ang giangkon sa CPA.

Gani miabot sa punto nga nagkinihaay na ang City Hall ilalum ni Mayor Michael Rama nga suspendido na karon ug CPA. Sa pagkakaron, pabiling naunsiyami ang maong proyekto nga alang unta sa kaayohan sa mga Sugboanon.

Hinuon, niining panaghiuli na sa maayong kabubut-on tali sa kagamhanan sa dakbayan ug liderato sa CPA, manghinaut kita nga moarangkada na usab sa dili madugay ang natanggong nga development project.

Kinahanglan usab nga padayon ang panagsabot sa duha ka kampo. Ug kinahanglan nga ang isig ka habig  adunay klaro nga komunikasyon, pagsinabtanay sa mga legal boundaries ug tinund-anay nga commitment sa gikasabotan.

Panahon na alang sa kalinaw ug panag-uban sa duha ka habig alang sa kasulbaran sa unsa mang problema nga nakababag sa kalamboan.

Ug hinaut nga ang panagtagbo ni Garcia ug Comendador maoy sinugdanan sa malinawong co-existence tali sa dakbayan ug CPA.