Tinuod nga rason
Nagkalainlain ang mga pagduda sa rason sa pagkataktak ni Migz Zubiri isip presidente sa Senado. Ang labing sibaw mao nga wa na ganahi ang Malakanyang niya. Kay ang mayoriya sa mga senador gituohan nga di kabalibad bisan unsay isugo ni Presidente Ferdinand Marcos Jr.
Kon mao, mirisi si Zubiri. Siyay gibasol sa pagkapilde sa Senado isip independenteng institusyon tungod sa iyang kasipsip sa palasyo. Labi na sa iyang pagkarakara og aprobar sa kadlawong dako sa Maharlika Investment Fund bisan sa lapad nga pagsupak sa mga ekonomista ug ubang mga sektor.
* * *
Managlahi ang mga pangagpas sa rason nganong nawagtang ang bilib ni Marcos kang Zubiri:
Unang bersiyon mao nga wa motuman si Zubiri sa iyang saad ngadto sa presidente ug ni House Speaker Martin Romualdez sa dinalian nga pagpasar sa kausaban sa economic provisions sa 1987 Constitution; samtang ang
Ikaduhang bersiyon mao nga wa siyang kabadlong sa imbestigasyon ni Senador Bato dela Rosa sa pasangil nga gibaraw ang operasyon batok sa giingon nga drug session nilang Marcos Jr., mga politiko ug mga artista sa condo ni Maricel Soriano niadtong 2012.
* * *
Dugang mga bersiyon sa kudeta ang gibisto ni dela Rosa:
Unang nangulo pagpalagpot ni Zubiri si Jinggoy Estrada pero, tungod sa paningkamot nilang dela Rosa ug kaubanan, napakyas pagkuha sa suporta sa labing menos 12 ka senador; pero
Nilampos ang ikaduhang pagsuway nga gipangulohan sa upat ka artista (Bong Revilla, Lito Lapid, Robin Padilla ug Estrada) human gibalibaran ni Zubiri si Revilla, kinsa gisakitan sa tiil, pag-apil sa sesyon pinaagi sa Zoom.
* * *
Ang bersiyon sa kudeta nga di angkunon sa mga senador mao nga samtang nakatampo ang mga rason nga nalista sa ibabaw dunay mas seryusong reklamo ang mayoriya sa mga senador batok ni Zubiri ug sa iyang mga sinaligan:
Gilaslasan og katunga ang ilang pork barrel karong tuiga (P3 bilyones imbes sa naandang P6 bilyones kada usa);
Napapas ang duda nga mga kongresista ang nagmaniobra sa budget dihang gipasabot sa grupo ni Romualdez nga nidako, wa mohiyos, ang budget sa Senado sa 2024; maong
Nakumbinser sa huhungihong nga ang grupo ni Zubiri maoy nakasipong sa P100 bilyones sa pork barrel para sa Senado.
* * *
- Latest
