Balaod ipatuman

Gikan ko sa Davao City ug sa pagtugpa gyud sa gisakyan nakong eroplano sa Mactan Airport lapas na ang tungang gabii kaniadtong Huwebes, mibunok dayon ang kusog kaayong ulan.

Bisan og nalangan ko sa pagpauli kay gipatuang pa man nako ang pagbunok sa ulan, apan nalipay ko sa hilom tungod kay ang pag-ulan makasulbad sa problema sa kanihit og tubig.

Mahimong wa gyud kaayo kadto makapuno sa mga pundohanan og tubig sa MCWD, apan arang-arang na lang kay ang tubig gikan sa uwan mituhop man gyud kadto sa yuta.

Nagpasabot nga nadugangan ang tubig nga moagos ngadto sa kasapaan, ug mopaingon kini ngadto sa Buhisan Dam, sa Jaclupan Dam, ug ilabi na sa sapa didto sa Barangay Lusaran.

Sa gikaingon na nako, malipay ko nga mag-uwan, bahala na og makasakripisyo usab kini sa ubang mga tawo nga way mga sakyanan, apan makasulbad kini sa problema sa kanihit sa tubig.

Apan mahimong temporaryo ra ang pag-uwan kay dala ra man kini sa tropical depression. Basin og kon moagi na ang tropical depression, mobalik na usab ang init.

* * *

Mora’g kinahanglan gyud tingali ang estrikto nga pagpatuman sa balaod aron nga masulbad ang kahugaw sa usa ka lugar kabahin sa pagpataka og labay’g mga basura.

Nakahigayon ko sa pagsuroy sa Dakbayan sa Davao, naglakaw ra ko kay duna ko’y tuyo sa usa ka banko, nakabantay gyud ko nga way mga basura nga nagpundok daplin sa mga karsada.

Lahi kaayo kon itandi dinhi sa Dakbayan sa Sugbo nga kon maglakaw ka sa karsada, daghang basura nga imong makita nga gipataka lang sa paglabay sa mga tawo nga abusado kaayo.

Sa dayon na nako nga pagpaingon sa Davao Airport, dul-an sa tunga sa oras ang among pagbiyahe luwan sa kotse sa akong amigo, wa gyud ko makakita og mga basura nga gipataka lang paglabay.

Misantop sa akong hunahuna nga tingali, estrikto gyud nga mopatuman sa balaod ang mga opisyal sa Davao. Dili tingali sila sama sa mga opisyal nato sa Dakbayan sa Sugbo nga igo ra’ng manghadlok nga silotan ang masakpang magpataka og labay sa mga basura, apan diay way gihimo.

Bitaw, awhag nako sa mga opisyal sa Dakbayan sa Sugbo nga estrikto natong ipatuman ang balaod. Tiaw mo, bisan diha sa Plaza Sugbo nga atubangan mismo sa Cebu City Hall, kon pakalitan nimo’g susi, naay mga basura nga imong makita.

Ngano man na? Duna may gipangdestino nga mga empliyado diha aron manglimpyo? Unya, ang mga tawo nga naghugaw-hugaw, nganong dili man nato silotan?