Tugnaw ug alimuot

Tugnaw ang panahon didto sa Estados Unidos sa akong pagbisita didto sulod sa pipila ka semana gikan sa nakalabay nga Abril hangtud sa Mayo. Kini bisan pa sa kasamtangang panahon sa spring sa maong nasud.

Na-shocked ko sa klima didto. Makagawas lang ko kadiyot sa hotel nga akong gipuy-an, lami na usab idagan balik sa sulod gumikan sa katugnaw. Kini ilabina sa didto pa ko sa Washington DC ug New York.

Apan sukwahi ang nahitabo dinhi sa Pilipinas, diin milyones ang mipiyait karon sa kahapdos sa naglagiting nga kainit sa panahon nga milapdos kanila sukad pa kaniadtong Marso gumikan sa El Niño phenomenon.

Hinuon, naanad na kitang mga Pinoy sa El Niño kay lagi ania kita nahimutang sa tropical nga environment ug haduol sa equator. Apan ang kasamtangan nga panahon mao kuno ang labing init sa kasaysayan sa nasud.

Dako na og epekto ang hulaw sa nagkadaiyang lugar sa nasud. Gani, dinhi sa lalawigan sa Sugbo, dili momenos sa 46 ka local government unit ang mitaho na og grabeng kadaut dala sa gabeng epekto sa El Niño phenomenon.

Kini ang hinungdan nga gikatahong mohimo og lakang ang kagamhanan sa probinsiya pagpaubos niini ilalum sa state of calamity karong semanaha isip panagang sa dugang epekto nga dala niining maong hulaw.

Ug ang di maayong sitwasyon sa mga tulonghaan maoy usa sa dakong epekto sa El Niño phenomenon sa nasud. Daghang klase ang gisuspenso hinungdan nga mibalik na usab ang uban sa online classes.

Hinuon, niining pagkamang karon sa climate change mugna sa walay habas nato nga pagwataswatas sa kinaiyahan, makapaabot pa kita nga aduna pay mas seryosong epekto ang umaabot nga mga El Niño sa kalibotan.