EDITORYAL - Kinaiyahan prayoridad unta
![EDITORYAL - Kinaiyahan prayoridad unta](https://media.philstar.com/photos/2024/05/17/banattoon_2024-05-17_22-26-29.jpg)
Importante kaayo kining mga bag-ong tukorong mga imprastraktura aron ang usa ka lugar molambo ug mahatagan og maayong kaugmaon ang mga namuyo sa lugar.
Ang gobiyerno maoy dunay kaakohan pagsiguro niini nga ang katawhan maserbisyohan ug walay mahikawan sa batakang panginahanglan sa tanan.
Apan unsaon man kun sa pagbuhat niini maguba man ang kinaiyahan? Kun gikinahanglang pamutlon ang daghang mga punoan sa kahoy, o patagon ang usa bukid, ug uban pa aron mabuhat ang proyekto?
Usa niini kaning balita bahin sa lungsod sa Poro sa Camotes Island, dunay gatosan ka mga punoan sa kahoy ang matud pa kinahanglang pamutlon kay magtukod og dalan sa maong lugar.
Mikisi-kisi ang mga molupyo sa maong proyekto kay lagi maguba ang kinaiyahan ug uban pang mga rason.
Sama ra sab kini sa pagtukod aning CCLEX nga nagkonektar sa Cebu City ug sa lungsod sa Cordova sa isla sa Mactan. Daghang mga mangrove o bakhaw nga naigo sa pagtukod niini.
Mao nga karon, pipila nalang sa mga kaniadto guwang na unta kaayong mga bakhaw ang nahibilin sa kilid anang access road taliwala sa utlanan sa Cordova ug Lapu-Lapu City padung sa CCLEX.
Ang nakapait, gamay nalang gani ang nahibilin, wala nalang sab bantayi sa mga barangay officials aron dili tiwasan og pamutol sa mga tawo. Karon, nagkaanam na og kahurot ang maong mga kahoy, walay nibadlong.
Kaning mga proyektong imprastraktura ilabi na kining mga karsada dako kaayo og matabang pagpalambo sa lugar. Daghan ang makabenepisyo kay dili lang ang mga adunahan ug mga naa sa gobiyerno ang makagamit kay para man kini sa tanan. Apan kutob sa mahimo, mangita og laing alternatibong kapilian aron lang dili kinahanglang gub-on ang ecosystem sa usa ka lugar diin tukoron ang proyekto.
Dili lang unta magpasulabi pagtihik-tihik sa budget aning mga proyekto, hatagan sab unta og konsiderasyon ang kalikopan.
- Latest