EDITORYAL - Pensiyon sa mga atletang Pinoy

Gituki karong panahona sa Ubos Balay Balauranan ang tinguhang hatagan og pension ang mga retiradong nasudnong atleta sa Pilipinas. Karon pa?

Niadto pa untang pagsugod og apil sa Pilipinas og mga international sports competition kini gihatag.

Pila naman ka dekadang niapil ang Pilipinas sa international sporting events, gani makadaghan ng gihatagan og dakong dungog sa mga Pilipinong atleta ang nasud.

Nangamatay nalang ang ubang mga atleta, wala gyud makatilaw og pension gikan sa gobiyerno gikan sa ilang pagka atleta. Ang nakaparat ani, tiguwang na sila aron makabalik og eskuyla o mangita og trabaho og bisan unsa aron isuporta sa ilang pamilya.

Mao kini ang rason kun nganong ang ubang mga nasudnong atleta ang nangita nalang og laing trabaho ini og sugod na nila og kalawos tungod kay wala man sab silay mapaabot gikan sa gobiyerno.

Gani, daghang kabataang atleta nga anha nagsugod sa grassroots programs sa mga LGUs ug sa mga eskuylahan , ini og abot sa high school hinayhinay nang mibiya ug namalhin sa mga amateur competition tungod kay duna silay paglaum nga moasenso.

Moasenso sila kun sa mga pribadong sporting promotions sila moduwa hangtud sila ma-propesyonal pinaagi sa pagtigum og mga daog, duna pa gyud silay dagkong kwarta nga premyo ug mga endorsements.

Ang kalainan lang, mas peligro ang ilang gisudlan kun itandi sa atleta sa gobiyerno nga diin daghang mga gidili.

Dunay giduso karon nga House Bill 3523 aron hatagan ang mga retiradong Pinoy Olympians og fixed nga binuwang pension gawas sa madawat nilang mandatory retirement benefits bisan unsa pa ilang performance kaniadtong atleta pa sila.

Kining HB 3523 maoy mag-amendar sa kasamtangang Republic Act (RA) 10699 o Sports Benefits and Incentives Act of 2001 nga naghatag og lump sum nga kwarta sa mga retiradong nasudnong atleta ug coaches nga nakadaog kaniadto sa international competition.

Bisan sa ingon ani nalang nga paagi, mabayran sa Pilipinas ang sakripisyo ug panahong gihatag aning mga atleta para makahatag og dungog sa kalibotan pinaagi sa disiplinang ilang giapilan.