Impostor misiaw

Misiaw karon ang mga tawo nga mangilkil sa mga tag-iya’g sakyanan nga moparking daplin sa karsada diha dapit sa Plaza Independencia ug Fort San Pedro.

Misaka ang akong kilay dihang mi-report ang among regular guest sa Traffic Management Board nga padayon kunong nangolekta og parking fees ang Tokagawa kaniadtong Domingo.

Si Cyril, miparking sa Legaspi Extension kilid sa Fort San Pedro ug gikolektahan siya og parking fee sa tawo nga giingon niyang collector sa Tokagawa.

Among gipangayoan og nga’n ug hulagway sa tawo nga nangolekta og parking fees gikan sa mga tag-iya’g sakyanan, ug taudtaud, mipadala si Cyril og video kanamo.

Sus, pagtan-aw nako sa video, nagduda dayon ko nga ang maong tawo nga nagsul-ob tuod og blue nga T-shirt, sama sa color sa uniporme sa collector sa Tokagawa, usa ka impostor.

Ang mga collector sa Tokagawa magsul-ob og uniporme nga minarkahan ang likud og CEPMA, ang minubo sa Cebu Parking Management.

Ang tawo nga nangolekta og parking fees kaniadtong Domingo sa mga sakyanan nga naparking didto sa Legaspi Extension nagsul-ob tuod og blue nga T-shirt apan way marka nga CEPMA.

Ikaduha, nagsul-ob ni og maskara ug nagkawo, ang mata ra’y makita, ug dunay kauban nga nagsige’g kuyog-kuyog kon asa mopaingon ang “collector.”

Daghang mga tag-iya’g sakyanan ang moparking sa mga karsada dapit sa Plaza Independencia kay dunay kalingawan nga gihimo diha, ingon man mga kan-anan.

Usbon nagko sa pagpahibawo, nga way gitugot nga pagpangolekta og parking fees dinhi sa Dakbayan sa Sugbo sa adlaw’ng Domingo, bisan pa ang Tokagawa/CEPMA wa sila tuguti nga mangolekta.

Busa, ayaw gyud mo pagbayad. Kon makakita mo og mga polis, ipadakop kining mga tawhana nga mga impostor nga parking fee collectors.

* * *

Nahibaw-an nako nga ang mga collector sa CEPA miundang na pagpangolekta og parking fees sa mga tag-iya og sakyanan sa adlaw’ng Domingo.

Resulta kini sa subsob nako nga pagbulgar sa ilang mga pangabuso nga bisan wa sa ordinansa nga mangolekta og Domingo, nangolekta gyud sila.

Kon gusto gyud sila nga mangolekta og Domingo, mahimo man tingali apan kinahanglang usbon ang ordinansa kay pagka karon kutob ra sa Sabado ang gitugot nga mangolekta og parking fees.

Unya, kon mangolekta ang Tokagawa/CEPMA sa adlaw’ng Domingo, usbawan nila ang ihatag nga bahin ngadto sa kagamhanan sa siyudad gikan sa parking fee collections.

Naghinamhinam gyud ko nga ang mga representante sa Tokagawa/CEPMA moatubang unta sa Traffic Management Board kay nangangkon ra ba gyud sila nga wa gyud kuno sila’y nalapas nga mga gidili sa ordinansa.