Kaduha gibaligya ang yuta

Dear Atty. Divine,

Ang akong mga ginikanan nakapalit og yuta lima ka tuig na ang nakalabay. Wa pa ma process ang pagbalhin sa titulo sa maong property apan ang akong papa misugod na dayon sa pag-ugmad niini  pinaagi sa pagpananum og mga kahoy. Karong bag-o nahibaw-an ni papa nga gibaligya pag-usab sa seller ang maong yuta nga una nang gipalit nilang papa. Ang akong pangutana kun unsa may mahitabo kun makaduha gibaligya ang property? Kinsa man ang mas dunay katungod niini? Daghang salamat. -- Mario

* * *

Dear Mario,

Basi sa atong Civil Code sa Article 1544, kini nagkanayon nga kun ang usa ka butang, personal o movable property makaduha gibaligya, ang buyer in good faith nga unang mi take possession sa property maoy dunay katungod nga makapanag-iya sa maong butang. Apan kun ang butang nga gibaligya immovable property sama sa yuta, ang atong balaod nagkanayon nga ang buyer in good faith nga unang nakaparehistro sa pagpalit o naka-transfer sa dokumento maoy makapanag-iya sa property. Apan kun way nakaparehistro kanila, ang buyer in good faith nga unang mi-take possession sa property maoy makapanag-iya niini. Apan kun ang duha ka buyer wa usab mo take possession sa property, ang buyer in good faith nga makapresentar og karaan nga titulo o dokumento sa pagpalit maoy makapanag-iya sa maong property. Busa sa kaso sa property nga napalit sa imong mga ginikanan, kun ang second buyer, wa maka-process sa transfer sa titulo then and imong papa ang mas dunay katungod niini kay sila man ang unang mi okopar sa property pinaagi sa pag-ugmad og pagpananum niini. Ang maayong buhaton karon sa imong mga ginikanan mao ang pag-process na sa transfer sa titulo aron dili sila maunhan sa second buyer. Thank you and God bless.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo