Ang angayang imantala

Maayong Balita

Karong Domingoha gitawag karon og World Communications Sunday. Diin gihatagan og igong pagtagad ang mga nagkadaiyang mga social communications platforms ingon nga mga mahinungdanong kahimanan sa pagmantala sa Maayong Balita. Ngadto sa tanang suok sa kalibutan. kini mao man ang gimando sa atong Ginoo diha sa iyang pag-ingon: Panlakaw kamo sa tibuok kalibutan ug isangyaw ang maayong balita ngadto sa tanang katawhan! Nunot niini ang pasalig nga Ako Magauban kaninyo hangtud sa katapusan sa Kalibutan!”

Kasinatian

Kadaghanan nato dunay mga cellphone ug uban pang mga kahimanan sa komunikasyon. Sa imong bahin giunsa man nimo kini paggamit? Kun gigamit nimo kini aron madasig ang tanan nan, usa ka dakong panalangin sa katilingban! Apan kun gamiton nimo ang maong kahimanan sa pagdaut ingon man ang pagsabwag sa dili tinuod nga impormasyon nan, usa ka dakong tunglo! Mas mahinungdanon nga hamtong kita sa atong pagsabot ug paggamit sa mga kahimanan sa komunikasyon.

Lihok

Gamita ang kahimanan sa komunikasyon sa pagsangyaw sa Maayong Balita. Post og mga Bible Verses, Quotes gikan sa mga Santos ug uban pang mga mensahe nga makapadasig ug makapalig-on sa pagtuo.

Pangamuyo

Amahan, himoa akong tinud-anay nga tinun-an sa imong anak. Unta akong masangyaw ang imong pulong sa gugma ug kamatuoran unta mismo ang akong kinabuhi mamahimong timailhan sa imong presensiya alang sa akong mga kaigsuonan. Pinaagi ni Kristo among Ginoo. Amen!