Garbo ray natandog

Hustisya maoy tiyabaw ni Mayor Michael Rama human ang Ombudsman mimando pagpaubos niya ug sa laing pito pa ka mga opisyal sa City Hall og unom ka buwan nga preventive suspension tungod sa reklamo sa upat ka regular nga mga kawani sa dakbayan nga wala sweldohi og 10 ka buwan.

Mibahad sab ang mayor og "pista sa mga kaso" batok sa mga tawo nga responsable kuno sa iyang gidangatan ug pagpakauwaw sa iyang pamilya.

Matud sa mayor wala siya kahibawo sa reklamo ug wa siyang patubaga sa wala pa ipakanaog ang preventive suspension.

Ug politika maoy iyang nakit-ang hinungdan niining daw kilat sa kapaspas nga paglusot sa iyang suspension order.

Wa siyay direktang gipasanginlan nga nagpaluyo niini apan sa iyang interview sa media sa kaulohan naghisgot siya og pagpanghilabot kuno sa gobernador sa mga kalihukan sa dakbayan bisan dili ni niya sakop.

Partikular niining gitumbok ang Cebu Bus Rapid Transit Project (CBRT), kasungian sa pagdumala sa MCWD ug ang bangi sa syudad sa Cebu Port Authority.

Tinuod di maayo ang relasyon nilang Rama ug Gobernador Gwen Garcia tungod sa panagbangi sa ilang mga baruganan sa daghang butang.

Apan di makiangayon nga ang gobernador iyang pasanginlan sa iyang gidangatan. Labaw na nga di makiangayon alang sa Ombudsman nga maoy nagmando sa unom ka buwan niyang suspension.

Way laing mabasol sa iyang sitwasyon karon kun dili ang iyang kaugalingon ug ang iyang sinaligan nga si Atty. Collin Rosell ug ang asawa niini.

Way nagsugo nila nga di sweldohan og 10 ka buwan ang upat ka mga kawani nga maoy nangreklamo didto sa Ombudsman tungod sa di makatarunganon ug pagpanglupig nga ilang gidangatan.

Ang sayop sa mayor mao nga iyang gipasagdan nga maghari ang pagpanlupig ngadto sa upat ka mga kawani diha sa iyang kaugalingong nataran.

Ug ubos sa doktrina sa "command responsibility" apil gyud siya sa angayang manubag.

Wa say angay si Rama nga moreklamo nga siya gilutos ug biktima sa "oppression" tungod kay wa nay mas tukma pa nga hubad sa pulong "oppression" gawas sa wala nila pagsweldo sulod sa 10 ka buwan sa mga kabos nga kawani.

Nasayod ba ang mayor sa kalbaryo intawn sa maong mga kawani unsaon paglahutay sa adlaw-adlaw nilang panginahanglan?

Duna pa bay mas tukma niini nga paghulagway sa "oppression"?

Labing siguro garbo ray natandog nilang Rama tungod kay sigurado ko nga di silang magutman sud sa unom ka buwan  nga way sweldo tungod kay mas maayo ang ilang kahimtang sa kinabuhi kun itandi sa upat ka mga ordinaryong kawani nga wala nila sweldohi!