Temporaryo nga programa

Namahayag ang hepe sa National Irrigation Administration (NIA) nga si Eduardo Guillen nga  mamaligya na unya ang mga Kadiwa Centers og bugas nga tag-P29 ang kilo karong bulan sa Agosto.  Adunay gibana-bana nga100 million ka kilo’ng bugas nga maani karong Hulyo pinaagi sa programa sa DA nga contract farming.  Apan 10 ka kilo lang nga bugas ang mapalit matag banay.  Lain na ba usab kini nga ulog-ulog nga prorama sa gobyerno? Tataw nga dili kini malungtaron.  Haum ang panultihon nga “Wala’y sama ka malungtaron sa temporaryo nga mga programa sa gobyerno”.  Fezteleern!

Likayan ang political circus

Gipasidan-an ni Senate President Juan Miguel Zubiri ang iyang mga kauban sa senado nga dili himoon nga political circus o ba kaha “witch hunt” ang ipahigayon nga mga pagdungog diha sa senado. Haum sa kahigayonan ang maong pasidaan ni Zubiri.  Dugang tambag sa akong amigo ngadto sa mga senador, “Kon aduna sila’y makita nga bitin sa senado, patyon na lang unta kini nila dayon.  Dili kay mag-umol pa og komitiba aron imbestigahan ang hinungdan sa presensya sa bitin”.  Pagkatoytoy!

Mapagan ang hulmigas

Namahayag ang Cebu Provincial Capitol nga walay nalapas nga balaod ang pagdumala sa probinsiya sa duha ka bus terminal.  Mahinumduman nga miluwat ang Cebu City government og show-cause order ngadto sa Capitol ngano nga dili pasirad-ang ang duha ka terminal tungod kay nag-operate kini nga walay business permit.  Lain na usab kini’ng anib sa panagbingkil sa syudad ug sa probinsya.  Hinaut nga maresolbar kini sa labing dali ug labing maki-angayon nga solusyon.  Kay kon dili, basin mahimo kining ehemplo sa panultihon nga, “Kon mag-sungag gani ang mga kabaw, ang mga hulmigas gayod sa ubos ang ma-ukay ug mabulabog”.  Muleeng!

Lagda nga wa’y katumanan  

Aron kuno maprotektahan ang mga botante sa naglagiting nga kainit sa adlaw, gilaraw sa COMELEC nga ipahigayon ang sayo nga pagbotar ingon man ang mall voting atol sa midterm election sunod tuig.  Nasayod na diay ang COMELEC sa lakat sa panahon sa sunod tuig atol sa adlaw sa eleksyon.  Hinoon, maayo man ang maong laraw apan seguroon lang pud sa Comelec nga motambong og sayo ang ilang gipang-assign sa mga presinto.  Baniog ra ba ang Pinoy nga maayo mohimo og lagda apan dili maayo mopatuman. Saaonz!

Pulos story, walang ‘inim’

Masuk-anon nga gihagit ni Senador Bato de la Rosa si kanhi Senador Trillanes nga mokuyog kini sa pag-serve sa warrant nga luwatan sa Internation Criminal Court (ICC) alang sa pagdakop unya kaniya ug kang kanhi Presidente Duterte.  Buot ni Senador de la Rosa nga si Trillanes maoy mopusas kaniya.  Tataw nga bunga lang sa kalagot ang hagit ni Senador de la Rosa.  Makapahinumdum sa duha ka hamtong nga nagpaabot nga adunay modalit kanila og ilimnon apan tungod kay wala man, igo na lang mituaw ang usa ka hamtong sa pag-ingon, “Pulos lang gyud ta ani story, walang inim (way inom).” Madahaan!