Langoy sa pangandoy sa Island Boy

Taliwala sa mga dautan nga balita karon, ibalanse una nato ang atong hisgotan sa mga positibong sugilanon nga atong nasugatan nga maghatag kanato og kadasig ug kaagaan sa atong gibati ilabi na nga hilabihan ka init sa panahon karon.

Bitaw sa nagpadayon nga Central Visayas Regional Athletics Association kon CVRAA Meet 2024, akong nahimamat usab ang usa ka 13 anyos nga lalaking maglalangoy nga si John Minguito gikan sa isla sa Gilutongan sakop sa lungsod sa Cordova atol sa iyang warm up sa 100 meter breast stroke event.

Nakita nako ang iyang determinasyon nga makab-ot ang iyang damgo nga makadughit og bulawang medalya sa nagpadayon nga paugnat sa kusog, dihang akong gipangutana unsay iyang inspirasyon, mitubag siya nga ang iyang pamilya ug ang isla diin siya nagagikan.

Makasaysayanon kini alang sa Isla sa Gilutongan kung makalangkat siya og gold medal sa regional meet, hinuon namatud-an niya ang iyang katakos atol sa Provincial meet diin gilangkat gyud niya ang bulawang medalya ug dinhi opisyal siyang giapil alang sa CVRAA 2024.

Sama sa akong gihisgotan sa akong lindog sa uban nga mga atleta ang sugilanon sa kinabuhi niining mga bata nga nag gikan sa kalisdanan, Si John  Minguito nagtubo sa isla nga hinikawan sa kahigayonan gani naa ra sa dagat nagtuyok ang iyang kinabuhi.

Hilabihan ka lisod ang ilang kahimtang hinungdan nga bisan unsa nalang nga panginabuhi ang iyang gisudlan, manginhas aron ikabaligya ug ang halin ipalit og bugas.

Siya ang ika onse sa 14 ka magsoon ug sakop usab siya sa nahimulag nga pamilya hinungdan nga naningkamot intawon siya nga masuportahan ang iyang kinabuhi ilabi na ang iyang pag eskwela.

Mangalsa siya og mga bug-at nga dad-unon sa mga tawo nga mobisita sa ilang isla aron adunay makuha nga suhol puno puno sa gasto niya sa eskwela hangtud nadiskubre ang iyang abilidad sa langoy nga iyang nagamit karon sa pagbugtaw sa iyang tingusbawan.

Dako kaayo ang kahigayunan nga layo ang maabtan sa bata kay matud sa iyang coach dili kini makabalo moreklamo ug hilabihan ka buotan nga bisan sa nasinating kalisod wala gyud kini niya baliha.

Siguro naanad na ang bata sa kalisod busa alang kaniya ok ra ang iyang kinabuhi kay man kini ang iyang naandan o ba kaha iya lang kining giagwanta kaniadto kay wala man siyay kapilian.

Ang ingon niini nga estorya ang angayan usab natong ipadayag aron makahatag kini og inspirasyon sa mga sama kaniyang bata nga maningkamot aron makab-ot ang pangandoy. Go Island Boy sa imong langoy sa pangandoy