EDITORYAL - David ug Goliath

Daghang nagpangagot ang ngipon ug bag-ang sa nahitabo sa mga tropa sa Pilipinas nga nagbantay sa West Philippine Sea gikan sa mga kamot sa Chinese Coastguard ning mga nanglabay nga mga buwan ug niini lang buwana.

Gibanggaan, gibombahan og tubig ug uban pang matang sa panaugdaog ang gihimo sa China sa mga Pilipino ilabi na sa mga sakop sa Philippine Coastguard, Bureau of Fisheries and Aquatic Resources (BFAR) ug ang mga mananagat.

Gani bisan mga aktibong miyembro sa Armed Forces of the Philippines nakapanghupaw nalang sa talan-awon nga daw wala silay mabuhat batok sa mga gipanghimo sa China.

Gustohon mang mosukol sa mga sundalo ug bisan ang mga sibilyan sa maong pagpangahasi, dili kini angay buhaton sa pagkakaron. Mahimong mangaguba ang mga barko sa Pilipinas aning mga agresibong gipangbuhat sa China sa West Philippine Sea, apan pwede ra kining mailisan.

Apan dili ang kinabuhi sa tawo sama sa mga sundalo, mananagat, coastguard ug taga BFAR. Mas importante ang kinabuhi sa tawo itandi anang mga barko. Mura og David ug Goliath ang tapad.

Lain man paminawon kay apan husto ang estratehiyang gipili sa administrasyong Marcos para ipahibalo sa kalibotan ang katungod niini sa WPS ubos sa United Nations Convention on the Law of the Sea (UNCLOS).

Kun bawsan sa Pilipinas ang China tungod lang sa diktar sa emosyon o gustong pamatud-ang dili kini padaug-daog pinaagi sa paggamit sab og kusog, dili kini makaayo sa mga Pilipino.

Paigo na kining pagkuha og mga videos ug ebidensiya  nga mapakita ngadto sa kalibotan aron paghipos og mga opinyon.

Makita nga ang China malapason sa international law ug dili na sila kumpiyansahan sa uban ug posibleng maapektahan sa kadugayan ilang ekonomiya.

Ang importante lang nga magpadayon ang operasyon sa Pilipinas sa pagpatrolya, pagprotektar sa kadagatan sa WPS ug sa mga mananagat nga nanginabuhi sa lugar ug dili hunongon ang pagpublikar sa tanan nilang gibuhat.

Kay kun magkinaunsa, ang China maoy maalkanse niini.  Bisag unsa pa ilang buhaton, ang WPS iya gihapon sa Pilipinas sa mata sa ubang mga nasud nga nagtamod sa UNCLOS, luyo niining padayon nilang pag-insister nga ilaha ang lugar.