Mula sa war zone tungo sa economic zone
Alam n’yo ba na sa kabila ng teribleng tagtuyot, maganda ang produksiyon ng palay sa Cotabato at Maguindanao? Aba, tingin ko lalo pang sisigla ang agricultural production kapag isinulong na ang programa na naglalayong i-convert ang dalawang lalawigan sa economic zone.
Ang Maguindanao at Cotabato ay dating sentro ng digmaan kaya hindi nakumpleto agad ang implementation. Ngunit ang administrasyon ni President Bongbong Marcos ay planong gawing isang economic zone ang mga lalawigan.
Determinado ang gobyerno na paunlarin ang mga ito sa pagpapatuloy ng isang programang nakatakda sanang ipatupad ng ama ni PBBM na si Ferdinand Marcos Sr. pero 1989 na nang mapasimulan sa dahilang alam na natin.
Ang ipagpapatuloy na programa ay ang Malitubog Madridagas Irrigation Project (MMIP) na inilunsad upang pasiglahin ang agrikultura at kabuhayan sa rehiyon.
Ang Phase I ay sinimulan noong 1989 na sasaklaw sa 5,562 ektarya sa Maridagao at 1,611 ektarya sa upper Malitubog. Ang Phase II ay ginawa noong 2011 hanggang 2015 na sumakop sa mga taniman sa Pangalungan at Datu Montawal sa Maguindanao del Sur at Pikit at Alaosan sa Cotabato. Ang sumunod na yugto ay sumaklaw sa 9,528 ektarya.
Nitong taong 2024, itinuloy na ng administrasyong Marcos ang programa. Umaasa ang lahat na wala nang makaaantala sa pagkumpleto sa proyekto upang maahon na sa kahirapan ang mga kababayan sa mga nasabing lalawigan.
- Latest
