EDITORYAL - Manamilit na ang jeepneys

Nagkaduol na ang deadline sa pag phaseout sa mga karaang tradisyonal nga mga jeep pasaheroan nga mahitabo karong Abril 30 ning tuiga.

Kini maoy rason sa gipahigayong protesta sa mga drayber ug operators nga wala kauyon sa matud pa sistemang gipatuman sa gobiyerno may labot aning public transportation modernization sama anang consolidation nilang mga drayber ug operator.

Ang consolidation mao ang pagpapundok sa mga drayber o hugpongon sila aron makahimo og usa ka kooperatiba. Ang rason sa gobiyerno paghugpong kanila mao nga aron mapasayon ang pagpalit og bag-ong modernong units pamasaheroan nga ipaagi sa utang sa bangko. Kay kini usa sab sa pamaagi sa mga bangko nga dili maalkanse sa ilang ipautang tungod kay kun kooperatiba, magdagan gyud kanunay ang mga sakyanan ug mokita. 

Apan hangtud karon kaning mga militanteng drayber padayun sa ilang pagdumili pagsanong niini tungod niini nga rason sama sa mahal ang modernong pasaheroan ug pagmentinar niini.

Kung buot tan-awon karon, mayoriya na sa mga public transport o mga pasaheroang nagdagan karon sa kadalanan sa Pilipinas pulos naman modernized jeepneys.

Pipila nalang ang mga nagdagan nga mga karaan ug kagang-kagang nga mga jeepneys nga maoy gustong ilisan ubos sa modernisasyon.

Sa ato pa, dili gyud lisud ang pagsanong aning konsolidasyon kay nakadagan man ug nakapadayon sa panginabuhi ang mga drayber ug operator nga nituman kay nakakuha man gyud sila og mga modernong pasaheroan. Mao gyud ang rason kun nganong kaning mga panawagang transport strikes sa mga dunay reklamo batok sa modernisasyon, wala nay epekto sa mga sumasakay tungod mas daghan pa ang mga nagdagang modernong pasaheroan ug mas daghan pa makargang pasahero nga nagdagan na karon.

Ang jeepneys nga usa sa mga sikat nga talan-awong sa kadalanan sa Pilipinas 70 ka tuig ng nagdagan, samtang ang uban man tuod niini wala buhata adtong mga panahona, apan lapas na silang tanan og 15 ka tuig nga maoy nalatid sa balaod aron luwas sakyanan ang pasaheroan. Nakita sa gobiyerno ug bisan gani sa publiko nga panahon na gyud nga wagtangon kining mga karaang pasaheroan sa kadalanan ug ilisan aning moderno ug haruhay nga mga jeepneys.