Unang Eulogio
Atong nahibaw-an nga si Leon Kilat nakataak sa Sugbo isip trabahante og botika ug dayon bakery sa 1895. Sa wa pa mokuyog sa circus sa Manila. Pagbalik sa Sugbo sa 1898, nagdala og suwat ni Heneral Emilio Aguinaldo nga nagtudlo kaniya nga pangulo sa Katipunan sa Sugbo.
Human sa kadaogan sa gubat sa Tres de Abril, gipalihug ni Leon Kilat ang iyang kaubanan pagpalit og tambal sa botika nga iyang kanhi gitrabahoan para sa samaran nga mga Katipunero. Mangahas ko sa pagpakigsawo sa nahipos nga dugang kasayuran parte sa Botica Antigua.
* * *
Ang Botica Antigua sa Sugbo narehistro sa 1892 human napalit ni L. Santos ang Botica de Santa Cruz gikan ni Pablo Schuster. Records sa 1899 nagpakita nga si Dr. Andreas Krapfenbauer, nga niabot sa Sugbo gikan sa Manila sa 1898, maoy tagdumala sa botika uban ni A. Pereira.
Ang botika nahimutang sa Calle Maria Cristina (karon M.P. Yap Street, kansang eskina sa Osmeña Blvd. maoy nahimutangan sa Coco Mall) dihang niabot ni Leon Kilat sa 1895 (nabalhin ang botika sa Calle P. Burgos sa 1901).
* * *
Ang duha ka tagdumala sa botika nahilambigit ni Leon Kilat:
•Si Santos ang nidawat niya isip trabahante sa 1895 ug nihatag niya sa ngan nga Leon (kay dunay laing trabahante nga ginganlan og Eulogio, ang alyas nga iyang gigamit sa pagpangaplay);
•Si Krapfenbauer, nga American citizen, maoy naabtan sa mga Katipunero sa 1898 ug wa magpabayad sa mga tambal human gipahibawo nga ang pangulo sa rebolusyon batok sa mga Katsila kanhi nila trabahante.
* * *
Ang mosunod bunga na sa tsamba. Dihang akong gisubay ang kasaysayan sa Botica Antigua sa “Panahom Dayong Kilumkilom” sa YouTube, nakatan-aw si Jose Duque, apo ni Eulogio Duque, ang kauban ni Leon Kilat sa botika. Si Jose anak sa bugtong anak ni Eulogio nga si Cresencio. Si Eulogio natawo sa Matutinao, Badian sa 1863, wa maka-eskuyla pero, nahibaw-an ni Jose gikang Cresencio, maayong mo-Kinatsila kay gitudloan sa tagdumala sa botika.
Pagbiya ni Krapfenbauer sa Sugbo sa 1922, nagpabilin si Eulogio sa Botica Antigua. Dihang ni-atake ang mga Hapones sa Sugbo sa 1942, nipauli siya sa Badian. Namatay si Eulogio sa 1944 sa edad nga 81.
* * *
- Latest
