Angayan lang nga ilhon ang Garbo sa Barangay

Ang paghatag og importansya sa imong katagibarangay dako kaayo og matampo sa pagdasig kanila nga maningkamot ug mosibaw sa mga gipili nga panginabuhi, kini ang gihimo sa Barangay Calawisan dakbayan sa Lapu-Lapu diin gipasidunggan nila ang mga nagpuyo sa ilang dapit nga nikulit og kalamposan.

Kini ang akong nasaksihan dihang gidapit ako sa pagtambong sa gipahigayon nilang Gabi ng Parangal sa mga malamposan nga Calawisanon didto sa ilang baranggay gymnasium diin makita sa panagway sa mga awardees ang dili mabayran nga kalipay nga giila ang ilang natampo nga garbo sa ilang baranggay.

Adunay amahan ug inahan nga nagmatoto sa ilang onse ka mga anak nga nagmalaposon usab, kabus man apan napadako nila ang ilang mga anak nga nahimong maayong molopyo sa baranggay maong apil sila sa gipasidunggan.

Anaa usay nitapos sa kolehiyo nga bisan sa ilang kakabus naningkamot kini sa pag eskwela ug nagbunga gyud kay nakuha niya ang medalya isip magna cum laude.

Dili basta basta ang iyang giagian kay maglakaw lang kuno kining bayhana sa unag tulay padung sa ilang eswkelahan sa UCLM, mag tsinilas lang kay lagi gitigom ang kwarta aron ipamalit sa mga school requirements.

Bisan gani kadtong mga nakapasar sa board exam, mga na honor sa eskwelahan gihatagan pasidungog kay aron madasig nga maningkamot ug mamahimong sumbanan sa uban nga maningkamot sa ilang kinabuhi ug panginabuhi.

Inisyatiba kini sa ilang kapitan nga si Arsilito Pejo ug sa tibook sakop sa baranggay council kinsa plano nila nga mopanday gyud og resolution aron magpadayon ang programa nga kon adunay mga bag-ong modumala sa barangay dili na kini maputol pa kay nahimoan naman og balaod.

Nindot ang ingon niini nga programa nga una nang gihimo usab sa LGU sa Lapu-Lapu ni Mayor Junard Ahong Chan nga angayan unta pud sundogon sa ubang barangay. Kung nahimo kini sa gamayng barangay sa Calawisan walay rason nga dili kini ma-replicate sa tanang mga barangay sa Opon ug sa bisan asa nga dapit.

Unta mapadayon kini ug molambo pa kay makapadasig kini ilabi na sa kabataan nga puno sa pangandoy sa kinabuhi, moabot man ang panahon nga mahulipan ang mga nangatungdanan niining programaha apan magpabilin ang ilang legasiya.