EDITORYAL - Pagdaginot sa kuryente

Nakasinati og kakulangon sa suplay sa kuryente ang Kabisay-an niining mga panahona nunot sa pagsaka sa demand sa suplay sa kuryente dinhi ug sa Mindanao diin nagagikan ang ubang enerhiya nga gigamit dinhi.

Gani sa update sa Visayas grid  kagahapon  Abril 2024 gibutang sa red alert ang estado sa suplay sa kuryente sugod ala-una sa hapon hangtud sa alas-8 sa gabii. Gikan sa alas-8 sa gabii hangtud alas-9 sa gabii ipaubos kini sa yellow alert.

Ang red alert ideklarar kun taas ang napanglantawang demand sa kuryente sa Visayas ug Mindanao. Tungod sab niini, ang gisaligang suplay sa kuryente gikan sa Mindanao mamenusan tungod kay gikinahanglan nila kini didto.

Gawas sa taas nga demand tungod sa grabeng kainiton sa panahon dala aning ting-init ug gipun-an pa sa El Niño phenomenon. Gikataho nga moabot 757.7 megawatts sa Mindanao-Visayas Interconnection ang kulang.

Tingali maayong maghinayhinay na ang mga konsumidor sa pagmatngon anang paggamit sa kuryente sa ilang mga balay. Kinahanglang pagngon ang tanang appliances kun dili gamiton ug likayan ang pagusik-usik sa enerhiya kun dili importante.

Panahon na sab gyud tingaling hatagan og pagtagad sa tanan, ilabi na sa publiko ang pagkat-on og daginot pinaagi sa paginstalar og solar power diha sa ilang mga panimalay kun kaya sa ilang bulsa.

Gani mas labing haom nga manguna paghimo niini, ang mismong mga buhatan sa gobiyerno lokal man o nasudnong ahensiya isip modelo para sa tanan.

Diha palang sa mga barangay halls, mga opisina sa gobiyerno kun naa silay kaugalingong edipisyo, mahimo kaayo silang mogahin og kwarta pagmuntar aning solar panels.

Kay pinaagi niini, gawas nga momenus ang ilang bayrunon sa bill sa kuryente, dili sila mapagngan sa kuryente kun dunay mga susama niini nga power outage tungod sa mga katalagman ug kausaban sa panahon nga nakaapektar sa tanan, ug makapadayon ra sila sa ilang panerbisyo sa publiko.