Alang sa atong Gugma sa Dios

Naglagiting ang kainit sa adlaw. Dunay masakiton nga akong giduaw.

Luoy kaayo kini sanglit dili na man makabarog ug nag-antos pag-ayo. May gi-surrender siya kanako ug kini ang iyang habak.

Ang habak, nga iyang gisul-ob sulod sa hataas na na nga panahon.

Apan lahi ra gyud kun himoon nimo kini pinasikad sa paghigugma.

Matud pang San Juan dela Cruz: “Kining tanan atong pagahimoon alang sa atong Gugma sa Dios!”

Kini lamang ang bugtong rason sa atong pagpanlimbasog ug pagbuhat sa atong mga kaakuhan. Usahay matintal kita sa lain pang mga rason kun nganong angayan kitang maningkamot apan kasagarang rason temporal ug taphaw lamang.

Alang nato garbo ang paghimo og mga apostolado aron tingali mabayaw ang atong kaugalingong dungog. Apan  kun ugaling mahitabo nga ikaw napasidunggan gumikan sa maong buhat sa kalooy naunsa man ang imong kaugalingong paghamtong sa imong kinabuhing espirituhanon.

Nauwaw ako sa akong kaugalingon nga nahinumdom ako ning maong panultihon sa among amahan nga si San Juan dela Cruz.

Sa laing bahin makatarunganon nga dili kita maghunahuna nga ang pangalagad kinahanglang dunay tugbang balos ug ganti.

Ang mahinungdanon kining tanan atong gihimo tungod ug alang sa atong dakong gugma sa Dios!

Ang pakighiusa sa Dios maoy mahinungdanong ganti alang sa  mga santos ug kun buot tinguhaon alang usab kanato.

Kay anaa sa Dios ang matuod nga kalinaw ug ang lunsay nga kalipay. Amen!