Diha sa kangitngit

Matud pa ni San Juan dela Cruz: “Ang paglahutay diha sa Kangitngit, pangandam lamang sa Umaabot nga Kahayag!”

Matag usa kanato moagi gyud og kasinatian sa kangitngit. Ang  kangitngit uban ang naghinobrang kalibog ug kawalay kapaingnan. Malisud kini nga kasinatian.

Malisud tugkaron kining maong hitaboa labina kun wala kita magpaabot niini.

Malisud dawaton kining hitaboa labina kun nakaamgo kita nga sugod pa lang daan sa atong kabatan-on atong gitinguha nga subayon ang dalang tul-id nga iya ni Kristo Jesus.

Mahadlok kita sa kangitngit labina kun naanad na kita sa kahayag.

Apan ang uban kanato nga naanad na sa kangitngit ang dili gyud malisang niini hinunoa ganahan sila nga anaa sa kangitngit aron dili makita ang ilang dautang tinagoan. Kun ang mga tawo sa kahayag malisang kangitngit, ang mga tawo sa kangitngit malisang sa kahayag.

Lisud ang anaa sa kangitngit sa pagpabangotan ug sa dili masabtang pagbati.

Daghang mga negatibong mga butang nga mosulod sa atong alimpatakan nga mopaluya kanato sa hilabihan apan angayan ba kitang mag-ampo alang sa kasulbaran?

Ang tubag dili. Hinunoa, atong pangayoon nga unta kita magmalahutayon sa pagsagubang ning maong kangitngit hangtud mobanag banag ang kahayag sa atong kalingkawasan.