EDITORYAL - Naanad paghulga sa gobyerno

Daghan ang wala nakauyon sa pamahayag ni kanhi House speaker Pantaleon Alvarez sa usa ka rally didto sa Tagum City sa Davao dili palang dugay.

Ang iyang pamahayag sa rally gikatahong nag-awhag sa mga sakop sa Armed Forces of the Philippines (AFP) sa pagtangtang sa ilang suporta kang Presidente Ferdinand Marcos Jr. kay matud pa niya, gitukmod niini ang kasundalohan ug ang nasud nga makiggubat sa China.

Matud pa niya, mao lamang kini ang pamaagi aron mapugngan nga magkagiyera ang Pilipinas ug ang China ug maluwas ang nasud gikan sa kaalautan.

Si Department of Justice Jesus Crispin Remulla mimando sa paghimo og imbestigasyon sa posibleng kalapasang nahimo si Alvarez. Partikular niini ang sedisyon ug posibilidad nga rebelyon.

Kahinumdoman nga si Alvarez maoy gitudlong House speaker sa panahon ni kanhi presidente Rodrigo Duterte.

Ang gobiyerno ni Duterte suod sa China kaniadto apan sa paglingkod ni Marcos giusab kining tanan sa naulahi ug nibalik sa pakiglambigit sa mga kanhi kaabin sa Pilipinas sama sa Amerika, Japan, Australia ug uban pa.

Ang kanhi administrasyon gipasanginlang dunay “gentleman’s agreement” uban sa China nga gisusi sab sa gobiyerno kun unsa ka tinuod tungod kay giisip kini nga “treason” o pagluib sa Pilipinas para sa uban.

Gihimakak sab kini ni Duterte ug mga kanhi niya miyembro sa gabinete. Unang nibutyag niini mao ang mismong tigpamaba kaniadto ni Duterte nga Harry Roque.

Si Duterte una nang nakwestyon sayo ning tuiga bahin sa pamahayag sab niya atol sa usa ka rally didto sa Davao City nga sa pagtan-aw ug pagsabot sa iyang mensahe panawagan kadto aron mobuwag ang Mindanao sa Pilipinas.

Hinuon gihimakak kini ni Duterte sa kauwahian, apan kinsa may makaprubar kun tinuod ba kini o dili? Apan paigo na ang iyang mga pulong aron maalarma ang mga naa sa gobiyerno.

Karon si Alvarez na usab, unya kun dunay himuong imbestigasyon batok sa iyang gipanulti unsa usab kaha iyang tubag?

Hangtud kanus-a man nga ingon anion pagtamay ug hulgaon ang gobiyerno sa Pilipinas? Kun mag-ingon ani lang pirme, matag dunay polisiya ang bag-ong molingkod nga liderato hulgaon, unsa may kaugmaon sa mga Pilipino?