EDITORYAL - Kuwang sa road safety signages

Ang pagmaneho, sakyanan man o motorsiklo nagkinahanglan saktong pahuway aron dili madisgrasya. Tungod kay anha kanunay mahitabo ang aksidente kun nagduka ang drayber ug gibutang niini ang kaugalingon sa peligro lakip na ang ubang tawo.

Apan duna say dakong kaakohan ang gobiyerno para sa kaluwasan sa mga motorista pinaagi sa pag-mentinar sa karsada sama sa pag-repair sa mga libaong ug labaw sa tanan ang pagbutang og mga road safety signages.

Dili lang signages, kondili ang pagpintal sa mga center islands, mga side railings, ilabi na sa mga karsada nga dili pwedeng mohunong o dunay speed limit nga gitakda ug kinahanglang hayag kini panahon sa gabii.

Kung mahimo gani butangan gyud og speed gun o speed sensors sa lugar, CCTV camera nga dunay traffic enforcers nga nag-monitor sa lugar aron ang tanan motuldo pagsunod sa traffic laws sa lugar aron luwas ang tanan gikan sa aksidente.

Usa sa sanglitanan sa labing kuyaw agian dinhi sa Dakbayan sa Sugbu kanang viaduct subay sa Cebu South Coastal Road nga motadlas sa South Road Properties sa habagatang bahin sa siyudad.

Ubay-ubay na ang mga nakalas sa lugar, kung dili tungod sa kusog kaayo og padagan, ang uban nakatagpilaw o wala kakita sa mga barriers.

Kanang viaduct nga likuon kaayo, adunay nag-ulang nga concrete barrier para sa padung sa habagatan ug sa amihanan. Samtang ang isi g ka kilid sa bungbong sa viaduct kuspaw na sab kaayo ang pintal ug di na dayon mabantayan ilabi na kun panahon sa gabii ug bisan sa udtong tutok tungod sa suwaw sa adlaw.

Gawas pa niana, kuwang kaayo ang road maintenance sa lugar tungod kay dunay mga debris, basura, mga natagak nga kargamento sa mga dagkong trak nga walay moako og hipos tungod kuyaw kay naghaguros ang mga sakyanan anang lugara.

Tinuod tulobagon sa mga drayber ang ilang kaugalingong kaluwasan, apan mas labing maayo pa gyud kun ang gobiyerno nagpakabana sab sa road safety pinaagi sa imprastraktura ug dili lang kutob sa pagpanakop niadtong mga malapason.