Kon mohagsang BRP Sierra Madre
Makapatandog ang pangutana sa usa ka sakop sa Philippine Marines nga nadestino sa BRP Sierra Madre pila na ka tuig ang nilabay: Kon ang Pilipinas mao ang tinuod nga tag-iya sa Ayungin Shoal, nganong gitugotan man sa gobiyerno nga kan-on sa taya ug malukop sa buslot ang barko gituyo pagsangad didto 25 ka tuig ang nilabay?
Dihang nahisgutan ni sa akong programang Panahom Dayong Kilumkilom sa YouTube niadtong Miyerkules, usa ka viewer nangutana unsa man ang plano sa gobyerno kon mohagsa ang barko ug mawad-an og pinuy-anan ang mga sundawo?
* * *
Pila ka buwan ang nilabay, gipahibawo sa kadagkoan sa militar ang plano sa pagtukod og tarung nga pinuy-anan sa atong kasundalohan sa Ayungin. Aron nga di na sila mag-ipli-ipli sa pagpasalipod gikan sa init ug uwan sa makaluluoy nga kabhang sa 80 anyos nang barko.
Pero tungod sa paggamit og puwersa sa China pagbabag sa resupply missions nga naglakip sa construction materials, pila ra gihapon ka pligo sa sin ug plaka sa puthaw ang napayuhot ipon sa binuwan nga rasyon nga bugas ug ubang mga pagkaon para sa kasundalohan.
* * *
Abunda hinuon ang ebidensiya nga di tinuod ang pangangkon ni kanhi Presidential Spokesperson Harry Roque sa gentleman s agreement nilang kanhi Presidente Rodrigo Duterte ug Chinese President Xi Jinping nga pasagdang madugta ang BRP Sierra Madre.
Si kanhi Defense Secretary Delfin Lorenzana, nga mas suhito sa mga lagda sa administrasyong Duterte sa West Philippine Sea (WPS), nipahibawo nga hangtod sa pagtapos sa ilang termino sa Hunyo 30, 2022, padayon ang pagpadala og construction materials para sa barko.
* * *
Si anhing Presidente Fidel Ramos nipadala og fighter jets sa WPS niadtong 1995 sa wa pa madani sa trade deals nga wa tumana sa China, si kanhi Presidente Joseph Estrada ni-baradero sa Sierra Madre sa Ayungin, si kanhi Presidente Gloria Arroyo dunay joint exploration sa WPS uban sa China pero gibasurang unconstitutional sa Korte Suprema, si anhing Presidente Noynoy Aquino nidaog batok sa China sa Permanent Court of Arbitration ug si Duterte nitila sa lapalapa ni Xi.
Adtong mahibaw-an unsay kalidad sa liderato ni Presidente Ferdinand Marcos Jr. sa iyang himuon sa Ayungin ug WPS sa mosunod nga mga adlaw.
* * *
- Latest
