EDITORYAL - Di magsalig sa gobiyerno

Aduna nay sobra usa ka libong kaso sa sakit nga Pertussis ang natala sa Department of Health, ug gituki na karon ang pagpahigayon og pagpamakuna batok niini ilabi na nga duna nay 54 ka mga tawong nakalas tungod aning maong sakit.

Sa uban mura og bag-o lang paminawon ang pertussis, apan mao kini ang gitawag kaniadto og ‘whooping cough’ kun sa binisaya pa ‘hutoy’ nga klase sa ubo.

Matud pa sa DOH makatakod kini ug dili lang basta makatakod, dali kaayong makatakod sa uban kun ang pasyente magsige og hutoy sa atubangan sa laing tawo nga wala magsuot og proteksyon sama sa facemask ug kadtong hinay na og resistensiya ang lawas.

Sama sa kaniadtong Covid-19, ang mga gihulagway nga daling matakboyan aning pertussis mao ang mga kabataan nga nag-edad 5-anyos paubos nga maoy labing daghang natala karong tuiga (77 porsiyento), ug ang mga senior citizens ug kadtong duna nay gidalang sakit nga nakapahinay sa ilang resistensiya o immune system

Ang DOH nagtinguha sa pagpamakuna batok niini apan nagnihit na ang suplay sa bakuna batok niini.

Ang bakuna matud pa mao kadtong 5-in-1 vaccine nga pangkontra og lima ka matang sa sakit sama sa pertussis, diphtheria, tetanus, Hepatitis B, ug Haemophilus influenzae type B.

Layo-layo pa ang summer season o tinginit nga diin sagad dunay daghang kaso sa mga sakit-sakit sa baga ug ang DOH naproblema sa stocks sa bakuna batok niini.

Busa ang labing maayong buhaton nga proteksyon mao ang pagtuman sa kaniadto protocol sa Covid-19, likayan ang pagsagol sa daghang mga tawo nga walay facemask nga gisuot, moinom og daghang tubig, manghugas sa mga kamot, pahuway og sakto ug mokaon og sustansyadong pagkaon.