Lapdos sa El Niño

Niining grabe nga kainit sa panahon mugna sa padayong paglapdos sa El Niño phenomenon, daghang eskwelahan sa nasud ang nakadesider pag-undang una sa face-to-face classes ug pagsagop sa online nga pagtuon.

Dinhi sa Metro Cebu ug lalawigan sa Sugbo, ubay-ubay nga mga local government units ang mipahunong una sa mga klase sa ilang mga lugar tungod niining pagsakdap sa grabe nga kainit nga dili na halos maagwanta sa mga estudyante.

Apan adunay mga local executive nga nagpaguryoguryo. Matud ni Cebu City Mayor Michael Rama, dili siya mopaundang sa klase. Iyang gihatag ang katungod paghunong niini ngadto sa  kadagkoan mismo sa mga eskwelahan.

Apan mipadayag ang kadagkoan sa Department of Education-7 nga mahimo kaayo sa mga opisyal sa dagkong siyudad sama sa dakbayan sa Sugbo pagbuhat og lakang kalabot sa pag-undang sa face-to-face classes gumikan sa El Niño.

“Last Friday, yes, apil to siya (Cebu City). But if there is a separate issuance from Mayor Mike Rama for Cebu City, then his issuance will prevail over that issuance of mine,” matud ni DepEd-7 Regional Director Salustiano Jimenez.

Apan alang kang Rama, dili siya bilib sa online classes ug home study tungod kay minos ang makat-onan sa mga tinun-an.

Mao nang iya na lamang giagad ang desisyon sa kadagkoan sa mga eskwelahan kon angay ba nilang isuspenso ang klase tungod sa El Niño.

Ambot kon insakto ba ang mayor sa iyang pangagpas. Kay sa akong nasayran, adunay mga aspeto ang online classes ug home study nga epektibo alang sa mga estudyante. Ug miagi usab kini sa makuting pagtuon sa DepEd.

Alang kanako, angay lamang gayud nga ihunong una ang face-to-face classes sa mga eskwelahan samtang padayon pang miarangkada ang naglagiting nga El Niño phenomenon. Alang kini sa kaayohan mismo sa mga estudyante.