Ang mental conditioning

Dili pa lang dugay dunay tulo ka mga batan-on ang gipangdala ngadto sa parokya kay lagi nasudlan daw og mga dautang mga Espiritu.

Ang usa gidala niadtong Sabado Santo, ug ang laing duha sa mga mosunod nga mga adlaw. Matag usa dunay gikahadlokan sama sa mga anino ug uban pang mga dili ingon nato.

Kun magpadala ka sa mga asoy sa mga tawo nga nitaho sa mga panghitabo nan, bation gyud nimo ang tumang kalisang. Bisan pa man kun dunay  kamatuoran ang presensiya sa mga espiritu ug mga elementals mahinungdanon sa gihapon ang paghatag niini og usa ka balanse nga panlantaw.

Sikolohikal, Pisikal ug Espiritwal. Sa akong personal nga pagduki duki ug pangutana akong nakaplagan nga dunay mga stressors nga maoy hinungdan usab sa ilang gidangatanl lakip na pud niini ang mga nabatasan sa pamilya nga gibansay bansay matud karon ug unya. Sama pananglit ang hunahuna nga gitanom nato sa mga alimptakan sa atong mga kabatan-onan ug ang atong kapakyas sa pagdasig kanila.Atong gitudlo nga dunay kalipay diha sa pagtuo apan nahimo kitang tihik sa usa ka malipayong pagsaksi.

Pun-an pa nga kanunay natong gilisang ang kabataan ug kabatan-onan sa panahon nga sila mamahimong masinupakon.

Ning atong kapanahonan karon daghan ang naglisud pagsugakod sa daghang mga pagsulay mao nga kinahanglanon kaayo imbis atong paharion ang kalisang ug negativity atong paharion ang positivity. Hinumdomi nga negativity attracts demons.

Ug sila nga nagsabwag ug negativity mga sulugoon sa demonyo.

Ang tanan magasugod sa panghunahuna sa matag tawo nga mahimong maumol diha sa iyang kasingkasing ug iyang mabansay diha sa iyang kinabuhi.