Mirisi sa NMP
Kahilas sa National Museum of the Philippines (NMP). Imbes balibaran ang donasyon nga pulpit panels kay klarong kinawat ug imbes tambagan ang private collector nga direktang i-uli ngadto sa Simbahan sa Boljoon nga mao ang tinuod nga tag-iya, ila hinuon nga gidawat ug gipasigarbo nga gasa para sa nasud.
Kamapangahason sa NMP. Imbes mangayo og pasaylo sa ilang pagdawat sa mga butang nga kinawat, kay sila ra man sab ang nisubay nga ang parokya sa Boljoon mao ang tinuod nga gigikanan, niangkon na nga sila ang tinuod nga tag-iya.
* * *
Kamakauuwaw sa NMP. Imbes mag-apura sa pag-uli sa pulpit panels, human gitawag ang ilang atensiyon sa mga molupyo sa Boljoon nga nakugang pag-ayo nga nakakita sa katigayonan sa ilang simbahan nga gikawat upat ka dekada nang nilabay, niinsistir na man hinuon sa pagtipig sa kabtangan.
Kapating sa NMP. Nipasalig nga dad-on ang pulpit panels sa Boljoon. Pero silay magbuot kanus-a. Ug di pa karon. Wa nila hukmi niadtong Pebrero. Ni sa Marso. Ni karong Abril. Unya pa nila hisgutan sa tigom sa NMP Board of Trustees sunod buwan sa Mayo.
* * *
Kabaga sa NMP. Imbes moangkon sa labing daling panahon nga way sukaranan sa balaod ang ilang pangangkon sa pulpit panels, niawhag hinuon nga kinahanglang imbestigahon una giunsa pagkawagtang sa kabtangan gikan sa simbahan.
Kasalbahis sa NMP. Imbes motabang pagsusi unsay mga balaod nga nalapas sa private collector, sa kura paruko nga namaligya ug sa ubang nakakupot sa panels, nipasumbingay man hinuon nga angayng basulon ang parokya ug Artsidyosesis sa Sugbo ug nga silay mas takos nga mopreserbar.
* * *
Katampalasan sa NMP. Imbes gamiton ang kontrobersiya sa pagtudlo sa tanang hingtungdan sa saktong mga lagda sa pagpamalit ug pagpangolekta sa karaan ug makasaysayanon nga mga butang, nga hingpit nga molikay sa paghimo og krimen, mao na man hinuon ang nag-una-una pagmatuod nga ang kadaghan og kuwarta ug ka-inila sa katilingban sa mga hingtungdan mahimong salimbong sa pagpangawat.
Maong mirisi sa NMP. Kon dayunon sila og kiha sa mga opisyal ug mga parokyano sa Boljoon tungod sa pagtanggong sa kinawat nga panels. Maayong sampolan ang NMP. Pagmatuod nga ang balaod mapahamtang sab diay batok sa mga hawod sa katilingban.
* * *
- Latest
