Nigimok na ang mga criminal

Mora’g nibalik naman usab og gimok ang mga dautan karon sa katilingban nga dili na magpanuko sa paghimo og krimen nga walay pagpanagana sa pagpasakit bisan kadtong mga inosenteng tawo.

Usa ka 26-anyos nga dalaga ang gipusil sa gikasakay niining lalaking tulisan. Gilabnot ang iyang gisul-ob nga fake necklace ug dihang nataranta o ba kaha nadeskobrehan nga fake ang alahas gipusil diretso ang pasahero nga nakaangkon og samad sa iyang liog nga niagi gyud gani sa air passage maong dili makaestorya ang biktima kinsa anaa karon nagpaalim sa pribadong tambalanan.

Nakasibat ang suspek kinsa padayong gipangita sa mga tinugyanan sa balaod, apan gipasalig sa kapolisan sa dakbayan sa Sugbo nga tutokan ang kaso ug madakpan ang suspetsadong tulisan.

Usa ka babaye ang biktima kinsa gikan sa Southern Leyte ug nanimapalad lang unta sa Cebu City kay siya man ang bread winner sa pamilya. Board passer siya sa pagka magtutudlo apan mintras naghuwat nga makaserbisyo sa public school nagtrabaho una siya isip private tutor apan naamong lang sa kadautan sa tampalasan nga tawo.

Maayo nalang kay dali siyang nadala sa tambalanan ug anaa na sa stable nga kahimtang pero dako usab kaayo ang ilang bayranan busa nagkinahanglan sila og suporta alang sa surgery niini.

Ang nahitabo sa babaye, mamahimo usab nga mahitabo sa uban kong dili madakpan ang naasoy’ng tulisan kay mousab pa gyud kini, palurang lurangon lang ang hitabo ug mobalik na sad sa iyang pagkadautan.

Kaniadto mahadlok ang mga kriminal kay manghay-ad man sila, daghang mga gipamatay. Apan karon mora’g mingaw naman, naay mga namatay apan nag unay man ang managsamang dautan. Kaniadto sa Duterte administration murag piso ang mga kriminal kay seguradong tiklo gyud sila.

Gipaneguro sa kapolisan nga malinawon gihapon ang dakbayan ug isolated ang kaso, tinuod nga kontrolado ang sitwasyon apan kong dili kini madali sa pagsumpo molipang gihapon kining mga tampalasan sa katilingban. Bati man kong mangandoy kita sa kamatayon sa mga dautan apan usahay mao gyud kini ang atong bation.

Laum ug salig lang kita nga masumpo dayon ang krimen nga nahitabo. In fairness sa CCPO, proven and tested na ni sila kong molihok madakpan ang mga kriminal, hinaut nga mao usab kini ang mahitabo karon.