EDITORYAL — Mga badlungong drayber

Samtang nagkadugay na nga nagdagan kining gitawag og modernized public utility jeepneys (MPUJs) nagkadaghan na sab sa ilang mga drayber ang mga badlungon.

Dili palang dugay, nagkadaghan ang mga posts sa social media batok aning mga pag-abusar sa mga drayber sa MPUJs, nasobrahan na ka mga kaskasero, overloading pirme, mohunong bisan dili loading ug unloading area ug makiglumbaanay sa ubang pasaheroan.

Maayo lang sa pasgugod kaniadto, hitsas pa kaayo, dili overloaded, limpyo ang sud ug gawas sa ilang mga unit ug matinahuron ang drayber ug konduktor. Labaw sa tanan nindot kaayo paminawon nga misunod gyud sila sa mga lagda sa trapiko.

Apan karon mura na sila og mga drayber sa karaang mga traditional PUJs kaniadto. Butang nga wala na gyud unta nila karon kay lagi moderno naman unta sila nga pasaheroan.

Gani duna nay mga aksidente sa karsada nga gikalambigitan aning mga modernong pasaheroan tungod aning ilogay og pasahero. Bisan puno na, overloading lang gihapon.

Naunsa naman ni intawon ang atong mga taga Land Transportation Office-7, taga Land Transportation Franchising and Regulatory Board-7, ang Highway Patrol Group-7 wala na makabadlong ani nila?

Bisan ang mga lokal nga traffic enforcement agencies sama sa CT-TODA sa Talisay City , CTO sa Cebu City, TEAM sa Mandaue City ug CTMS sa Lapu-Lapu City dili ba gyud pwedeng padlungon og isyuhan og citation tickets kining mga abusadong drayber karon?

Kaning mga drayber ug mga operators dili ni sila motuldo sa mga lagda sa trapiko kun ang mismong tigpatuman niini dili moseryuso sa ilang trabaho sama anang inspeksyon, road checks, roadside drug test bisan walay okasyon, ug daghan pang uban.

Kay kun dunay mga regular nga inspeksyon nga dili i-eskedyul, magkinto ug magtinarong kining mga drayber hasta ilang operators.

Subo kaayo gyud pamalandungon nga anha ra mosanong ang tanan kun duna nay dili maayong nahitabo.