Pagsulay nga nasinati sulod sa simbahan

Human sa tumang pag-antos ni Hesus aron maluwas ang mga tawo gikan sa sala nga gitimaaan atol sa Semana Santa, mipatigbabaw na ang kadaugan sa katarong human siya nabanhaw nga gisaulog nato sugad kagahapong adlawa ug hangtud sa hangtud na. Bisan og ang tanan paghandum nalang sa sakripisyo sa Manunubos apan nahimong solemne ang pagtimaan niini.

Nagpakita usab kini sa kapasayloan sa atong mga kasal-anan, busa alang niadtong adunay mga gikabikil diha mamahimo nang magpinasayloan sa tagsa-tagsa ka mga sala kay kong si Hesus nakapasaylo nato, kita pa kaha ngadto sa atong isig ka tawo.

Akong ipaambigit lang ang akong kasinatian nga pagsuway atol sa akong coverage sa Easter vigil sa Cebu Metropolitan Cathedral diin literal gyud nga nabutang sa pagsuway ang akong pagbati nga nauwawan ug nahiubos nga nasakitan human usa ka lalaking church server ang nibadlong nako nga dili kuno pwede ang media sa sulod sa Cathedral. Nakugang intawon ko kay sa kadugay na nakong ga-cover sa mga kalihokan sa simbahan kadto pa ko nabadlongan. Busa naa ra ko nagbarug sa kilid dala akong cellphone ug tripod kay tumong lagi nako nga ma-live stream bisan ang homily ni Archbishop Jose Palma alang sa mga tawo nga dili makatambong sa Easter vigil mass.

Sa ikaduhang higayon mibalik ang lalaki og gisita na sad ko nga no media allowed lagi daw ug naa pay palabtik nga pulong nga kong dili ko mogawas pasensyahay nalang daw mi. Pastilan mora’g hulga naman to unya kusog pud iyang tingog. Dunay niduol nga babayeng church server ug gibadlong siya ug mao pa kini ang nangayo og despensa sa gibuhat sa iyang kauban.

Gipasabot nako sila nga adunay pagtugot mismo ang among presensiya sa pag-cover sa misa, akong gipahibawo sila nga mismo gani si Father Jhapet Geonzon nga maoy vice chairman sa Commission on Worship ang akong partner sa akong live streaming dihang wala pa magsugod ang seremonyas diin siya ang naghatag og pasabot kon unsa ang meaning kalihokan, naa man gyud na sa opening sa akong live streaming kaming duha ang nagtabi. Ni-excuse lang si Padz dihang nagsugod na ang Blessing of Fire hangtud na sa pagsugod na sa misa.

In fairness sa mga pari, labi na si Archbishop Palma, hilabihan sila ka buotan nga moabi abi sa mga tawo bisan kinsa ug unsa ang background ma media man o dili. Apan usahay kining uban nga mga tawo nga gihatagan lang gamay og responsibilidad nga mo-manage sa sulod sa simbahan mao naman hinuon ang molihok nga mora’g si kinsa.

Ang pagsabwag sa pulong sa Dios dili mahimong exclusive lang sa simbahan kay duna man silay Facebook portal diin naka live stream ang misa. Dili kini fundraising concert nga bawalan ang uban nga motan-aw ug mo-cover sa kalihokan.

Sa sinugdanan gibati ko og kauwaw nga naglagot apan dihang nabati nako ang pulong sa Dios pinaagi sa wali ni Archbishop Palma nahupay kini ug mipatigbabaw sa akong kasingkasing pasaylo nga nagpasabot lang nga nabuntog nako ang dautan nga gibati sa akong kasing kasing ug nagmadaugon ang katarong sa akong pagbati.Malipayong Pasko sa Pagkabanhaw!