EDITORYAL - Red Notice batok kang Teves

Nadakpan  na ang gitaktak nga kanhi kongresista sa 3rd District sa Negros Oriental nga si Arnolfo “Arnie” Teves Jr. didto sa  Dili, East Timor. Gidakop kini matud pa samtang nagduwa sa Top Golf Driving Range and Bar niadtong Huwebes sa hapon.

Si Teves nagatubang og patong-patong nga kasong murder  may kalabotan sa masaker nga gikamatay ni anhing Negros Oriental Governor Roel Degamo ug siyam ka mga supporters sa naulahi niadtong Marso 2023,  ug laing tulo nga nahitabo niadtong tuig 2019.

Gawas sa iyang mga kaso, si Teves gideklarar sa gobiyerno sa Pilipinas isip usa ka terorista. Ang pagdeklarar kaniya nga usa ka terorista nakatabang og dako pagsikop kaniya human nga siya gimarkahan sa International Police og Red Notice.

Kini tungod walay nasud nga mosugot nga dunay tawong gikonsiderar nga terorista sa laing nasud nga gawasnong maglaruy-laroy lang sa ilang kadalanan.

Unsa may kalainan ni Teves sa kaniadto lider sa Communist Party of the Philippines nga si anhing Jose Maria Sison nga nagtago didto sa The Netherlands?

Si Sison bisan og duna kini mga kasong kaparehas ni Teves ug gikonsiderar sab nga terorista sa gobiyerno sa Pilipinas, politikanhon ug may kalabotan sa idolohiya ug rebolusyon ang kinaiya sa iyang mga kaso.

Midagan si Sison ug gidawat sa maong nasud human siya nangayo og political asylum tungod kay gilutos siya dinhi sa Pilipinas.

 Ang maong nasud migarantiya sa iyang kaluwasan ug seguridad sanglit para kanila politikanhon ang rason sa pagdangop niini kanila tungod kay sa ilang nasud gawasnon ang tanan kun unsa ilang baruganan sa politika sa  relihiyon ug tinuohan.

Sukwahi kang Teves nga suspek sa mga pagpatay diha sa mismo niyang lugar sa Negros Oriental nga tanan may bulok politikanhon o panagribal sa politika ang hinungdan.

Si Teves gidakop pinaagi sa International Police (Interpol) - National Central Bureau (NCB) sa Dili ug kolaborasyon sa East Timorese Police. Nagpasabot lang kini nga ang mga pinangita sa balaod, maabot ug maabtan ra gihapon sa taas nga pisi sa hustisya.