Visita Iglesia

Niduaw kami og pito ka mga simbahan kagahapon. Gihimo namo ang pagpamalandong sa pito ka mga kagul-anan ni Maria.

Sa among paghimo niini ako usab nga giobserbahan nako ang mga balay nga alampoanan. Adunay hilom, dunay medyo saba.

Duol sa maong mga balay alampoanan ang mga nagkadaiyang patigayon ug baligya.

Kini tungod kay kabahin ning maong kalihukan matag semana santa nga moabot.

Ang nakadaut kay daghan sa mga tawo ang wala makasabot sa tinud-anay nga bulok sa kahulogan.

Imbis mag-ampo himoon na lamang ang pagsuroy suroy.

Ug kining maong lehitimong tinguha sa pagpalambo sa religious tourism ang dili  malalis nga kuyog gihapon sa panaw sa pagtuo. Nga kun dili nato makontrol mamahimong mantsa sa kalunsay sa atong pagtuo.

Sa akong gihimong pagsuroy suroy sa maong visita iglesia akong naamgohan nga ang pagtuo ingon nga panaw usahay kapoy ug laay.

Laay tungod kay nahanaw man ang relihiyosong kaikag sa pagpanalipod sa pagtuo ug ang pagsangyaw niini, daghang mga kalag nga wala maatiman sa ilang mga magbalantay.

Mas nahatagan og igong pagtagad ang abot ug bahandi nga gikahinaman.

Daw sa napukan ang kainit sa panghunahuna kay ang nahitabo karon walay tarong ang mga gipangbuhiang mga pulong ingon man balansayon sa daghanan kanato.

Ang Visita Iglesia nipahinumdom nga luyo sa mga maanindot nga mga altar ug retablo anaa ang mga bakho sa mga kabus nga naghigwaos.

Pun-an pa sa atong mga halangdong lideres ning nasud nga nagmasakiton, mas normal naman diay nga panalipdan ang mga criminal ug dautan kaysa mga inosente ug walay ikasukol nga mga biktima.