EDITORYAL — Parking fee sa Domingo

Daghan ang nangreklamo batok aning way pasaylo nga pagpangolekta og parking fees bisan adlaw nga Domingo sa parking aides sa usa ka collection agency nga gi hire sa siyudad sa Sugbu.

Ang reklamo naabot sa buhatan ni Mayor Michael Rama ug gusto sa mayor nga hunongon kini.

Matud sa mayor, dili gyud unta angay kolektahan og parking fees sa mga roadside pay parking areas ang mga motorista anang adlawa.

Ang parking collection agent nga gireklamo mao ang Tokugawa Global Corp.

Pagkatinuod dugay naman kini nilang gihimo, karon palang gyud nakaabot sa buhatan sa mayor.

Kaniadto libre ra gyud ang parking matag adlaw nga Domingo, dako kaayo og madaginot ang mga motorista.

Ilabi na sa mga tawong manimba sama diha sa Basilica Minore del Sto. Niño kada adlaw nga Domingo.

Mao sab diha sa mga parkingan duol sa mga tambalanan, kada parking bayad, luoy ang tagtungod sa pasyente nga nagdagan dagan sa pagpalit og mga tambal nga wa sa ospital, magdoble doble ang mabayran ilabi na kun mawagtang ang resibo o ba kaha bag o pang nirelibo ang parking aide. Takulahaw lang, kalit naman nga dunay mangolekta bisag adlaw nga Domingo.

Ang parking fee P20 sa unang usa ka oras, ug mapun-an kini kun molapas kay basihan sa parking aide ang oras nga naa sa resibo.

Apan gawas anang parking aide, naa pa gyuy mga estambay nga gihimong pangwarta ang parkingan pinaagi sa pagbantay ug pagtabon sa motor.

Maayo nga naabot kini sa atensyon ni Rama. Kun gidili ang pagkolekta sa adlaw nga Domingo, asa diay padung ang nakolekta anang adlawa?

Naa bayay parking aides nga modawat sa parking fees nga di na moisyu og resibo ilabi na kun nagdali ang motorista. Naa say ubang parking aides nga kusog maninghag unya way konsiderasyon sa motorista bisag mihangyo na kay kadiyot ra ang tuyo sa lugar, pabayron gyud ug kun dili gani, papahawaon kay nakabalda kuno sa trapiko nga kun buot hunahunaon, nitupad ra sa nagbayad nga namarking.

Mao man ni ang ubang kalaki sa mga makasuot lang og uniporme ug mag ID , molabaw pa sa mga tinugyanan sa balaod nga diin wala gyud silay kabangkaagan sa mga teknikalidad sa balaod.