Tulisan sa Cordova nadakpan sa drug bust  

CEBU, Philippines — Nasakmit sa kapolisan  ang armas ug shabu gikan sa gipasanginlang pusher nga mo-sideline usab sa pagpanulis sa Lungsod sa Cordova.

Ang suspetsado nga nadakpan sa buy bust operation sa Cordova Police Station nga gipangulohan sa ilang hepe nga si Police Major Michael Gingoyon   ang giila nga mao si Jay-R (apilyido gipugngan) alyas Onom, 23 anyos nga nagpuyo sa Barangay Buagsong sa nahisgotang lungsod. Ang maong dinakpan maoy suspetsado sa mga nagsunodsunod nga mga nahitabong tulis sa nagkalainlaing barangay sa maong lungsod. Nadakpan ang maong suspetsado sa mga sakop sa Drug Enforcement Unit sa Cordova Police Station kauban usab sa mga sakop sa PDEA 7 didto duol sa ilang panimalay ug  nakuhaan kini og 16 gagmay’ng paketeng dunay sud nga gidudahang shabu, ug usa ka .9mm caliber revolver nga adunay duha ka bala. Matud pa ni Gingoyon nga ilang nailhan ang suspek human nila matan-aw ang footage ug ilang nakita ang dagway nga mihaum sa gihulagway sa mga gitulis sa maong lungsod.

Ang suspek gikatahong miangkon nga ang mga cellphones nga iyang makuha iyang giprenda sa pawnshop.  Sa pikas bahin, nadakpan sa mga operatiba sa PDEA Siquijor Provincial Office ug Larena Municipal Drug Enforcement Unit ang usa ka bag-o pang niapil-apil sa negosyo sa ilegal nga drugas atol sa buy-bust operation diha sa Barangay Cangmalalag, Larena, Siquijor.

Ang dinakpan usa ka 50 anyos nga negosyante ug graphic designer, residente sa Barangay 6, Dumaguete City, Probinsya sa Negros Oriental.  Nakompiskar sa maong operasyon ang lima ka putos sa gituohang shabu nga motimbang og 3.5 grams ug mobalor og P23, 000, buy-bust money, celphone ug ubang non-drug evidence.  Nasayran ang Baragay Cangmalalag usa ka drug cleared barangay ug sigon sa PDEA-7. IBM BANAT NEWS