EDITORYAL - Kumusta ang war on drugs?
![EDITORYAL - Kumusta ang war on drugs?](https://media.philstar.com/photos/2024/03/05/banat-toon_2024-03-05_22-13-18.jpg)
Makahibulong ug dalang makadismaya sa publiko nganong imbes mogamay, daw midaghan man hinuon ang pagkatap sa ilegal nga drugas dinhi sa Pilipinas.
Kini bisan pa man og miagi og unom ka tuig nga “hugot” ang kampanya batok niini sa panahon ni kanhi presidente Rodrigo Duterte sa iyang ‘war on drugs’ nga gihulagway nga duguon tungod kadaghan sa mga nangamatay kay “nanglaban.”
Apan bisan pa sa hugot ug duguon nga war on drugs ni Duterte, imbes mogamay ang mga shabu nga makuha sa mga buybust operations, nagkadaghan na man hinuon.
Sa administrasyong iyang gisundan, sa panahon ni kanhi anhing presidente Benigno Simeon Aquino (P.Noy) ug sa nanglabay nga mga pangulo sa nasud, gramo-gramo ray makuha.
Maihap ra sa tudlo ang madakpang makuhaan og usa ka kilong shabu. Apan sa panahon ni Duterte hangtud sa naghinapos nga bahin sa iyang termino, kinilo naman ang makuha sa kapolisan.
Tungod ba kaha kay sa nanglabay nga mga administrasyon kuwang ra sa aksyon ang mga polis? Tungod ba kaha kay daghan ang drug protectors ug mga Ninja cops, apil mga politiko apil sab sa nalambigit?
Apan makahibulong nganong kinilo naman ug pinutos pa gyud og Chinese teabags ang mga nakuha sa atong kapolisan karon.
Laing makasagmuyo karong panahona, ang mga nadakpan kaniadto sa panahon ni Duterte ug nabalhog sa mga prisohan karon, padayon gihapon sa ilang negosyo diha sa sulod.
Ang ilang mga sakop sa gawas maoy ilang mga gaway nga naglihok para kanila. Hayahay kaayo kay gwardiyado, libre ang pagkaon ug wala na gukda pa sa mga otoridad ang mga druglords nga naa sa prisohan.
Laing makasagmuyo sab kining mga nagpaubos og drug rehab ug nakagradwar niini, namalik man sa ilang mga bisyo. Epektibo ba ang mga programa sa gobiyerno para kanila? Nganong naingon man niini ang kampanya sa gobiyerno batok sa ilegal nga drugas? Dili ba unta mogamay na gyud ang supply niini hasta ang mga mamaligya niini? Apan karon dinaghan naman hinuon.
Ang kampanya sa kapolisan ug sa gobiyerno magmalampuson lang kun motabang ug seryuso ang tanan, apil ang publiko sa pagsumpo sa ilegal nga drugas.
- Latest