Tommy mag-vice mayor?

Dugay na ko nga nakadungog nga si kanhi mayor Tomas Osmeña molansar pagka vice mayor sa Cebu City sa eleksiyon karong sunod tuig, apan nagtuo ko nga adunay katuyoan niini si Osmeña kon iya kining himoon.

Nakabasa ko og balita nga gipahibawo na gyud ni Tommy nga molansar siya pagka vice mayor kon si Cebu City Councilor Nestor Archival maoy mokandidato pagka mayor sa ilang grupo nga Bando Osmeña Pundok-Kauswagan.

Dili na kuno si Tommy molansar pagka mayor kay samtang maayo pa kuno siya’g pangisip, luyahon na ang iyang lawas ug dili na makasugakod sa mga gimbuhaton pagka mayor nga daghan og asikasuhon.

Nakahinumdom ko sa gisulti kaniadto ni Tommy dihang nahimo siyang kongresista nga nagrepresentar sa Cebu City south district nga "boring” kuno kaayo ang trabaho sa kongresista. Aw, tingali, agwantahon na lang niya nga mag vice mayor.

Posible sab nga dili na gusto si Tommy nga magka-atbang sila sa politika si Mayor Michael Rama.

Hinay-hinay na nga mitumaw ang mga ngalan sa gustong magmayor dinhi sa dakbayan. Si Atty. Joey Daluz III, mipahibawo na nga posibleng mag-tandem sila si Kapitan Dave Tumulak.

Kon dawaton ni Archival ang tanyag kaniya ni Tommy nga modagan siya pagka mayor, mag-tandem sila si Osmeña. Unya naa pa si Yogi Ruiz nga nagsige na og birada sa social media aron mailhan siya sa mga botante.

Pero dunay sipyat si Tommy sa iyang lakang karon. Kini mao ang pagsalikway niya ni Kongresista Cutie Del Mar kay matud niya “I don’t like Cutie.”

Wa mahunahuna ni Tommy nga daghan kaayo ang nagmahal sa mga Del Mar sa north district tungod sa maayong mga binuhatan sa iyang amahan.

Angay timan-an ni Tommy nga ang mga botante dali ra nga mahinumdom sa apelyido sa tawo nga matinabangon kanila, ug kining mao nga batasan ni Raul Del Mar kaniadto, gisunod ni Cutie.

* * *

Ang government weather bureau nagbalik-balik gyud pagpahibawo nga dia na kita karon sa El Niño, apan magpasalamat kita kay wa kaayo nato masinati ang kanihit sa tubig dinhi sa Cebu City.

Medyo sa ubang dapit mihinay lang ang presyur, apan wa gyud mawala ang tubig. Tungod kini kay napangitaan man daan sa kadagkoan sa MCWD og pang-alkontra ang pagnihit sa tubig.

Pinaagi sa pakigkontrata sa MCWD ngadto sa JE Hydro Bio-Energy Corporation nga mosuplay kini og 30,000 cubic meters nga tubig sa MCWD kada adlaw, natabangan sila pagsulbad sa problema.

Limpyo ang tubig nga gisuplay sa JE Hydro kay gikan kini sa sapa sa Barangay Lusaran, unya gi-process aron mahimo na nga mainom ug magamit sa pagluto og mga pagkaon.