EDITORYAL - Nagtinga nga idolohiya

Subo kaayo palandungon nga duna gihapoy mga kinabuhing nausik tungod sa insurhensiya sa mga hilit nga dapit sa Pilipinas. Kini bisan pa og daghan nang gihimo ang gobiyerno aron mahunong na kining kinadugayan nga insurhensiya sa tibuok Asya.

Ning bag-o, unom ka kinabuhi sa mga Pilipino ang nawala didto sa Bilar, Bohol human sa nahitabong engkwentro tali sa kapolisan, kasundalohan batok sa mga gidudahang sakop sa New People’s Army.

Ang militar sa nanglabay nga mga buwan miingon nga nagpadayon ang pagkubos sa pwersa sa NPA tungod sa kadaghan na sa ilang mga lider ang nakalas ug nitahan ug nibalik sa sabakan sa gobiyerno.

Apan subo lang nga bisan sa kampanya sa gobiyerno nga luwas silang mabalik sa ilang mga pamilya aduna gihapoy dili gustong suwayan ang kalinaw pinaagi sa pakigsabot  ug mosalig ang malinawong proseso.

Sa kadugayon na sa insurhensiya sa komunismo dinhi sa Pilipinas, hangtud karon wala pa gihapoy nakatumbok sa unsa gyuy ugat niini?

 Pila na man ka mga intelektwal nga mga lider sa ilang grupo ang nangagi, wala gyud nila bisan usa nga nakatumbok kun unsa gyud ilang gustong mahitabo o unsa ilang gustong buhaton sa gobiyerno aron mohunong sila sa ilang pakigbisog? Para unsa man?

Apan kun ang ilang gusto ug ipamugos nga pulihan og komunistang matang sa panggobiyerno  ang kasamtangang gobiyerno,  dili gyud kini dawaton sa kinabag-an sa mga Pilipino. Mas gubot pa unya ang Pilipinas itandi sa ilang lima ka dekadang insurhensiya kun matinuod.

Namat-an na kaniadto pa sa mga Pilipino nga dili gusto og komunista ug kadaghanan nagtuo gyud nga dautan ang  mao nga idolohiya.

Kun ipadayon kini sa pagduso ug pugsanong inudnod sa mga tawo, mosuki gyud hinuon ang populasyon ug isipon silang kaaway.

 Daghan na ang nag-ingon, bisan mismo mga kanhi NPAs nga “himatyunon” na ang ilang kawsa tungod wala nay kahulogan ang ilang idolohiya sa pagkakaron pun-an pa sa kurapsyon, abuso, ug walay direksyon sa ilang liderato. Kinahanglan pa gyud sa gobiyerno karon nga buboan og pundo ang imprastraktura, serbisyo, agrikultura ug seguridad sa mga hilit nga dapit aron nga mahunong na kining kayugot sa mga tawo sa pagkulang sa gobiyerno kay kini maoy gigamit nga rason nga sila  mirebelde.