Nahimong legitimate ang bata human sa kasal

Dear Atty. Divine,

Bag-o lang mi nga nagpakasal sa akong live-in partner. Ang among anak 3 years old na ug ang apelyido nga gigamit sa iyang birth certificate mao ang apelyido sa iyang amahan.

Apan tungod kay dili pa mi kasal sa dihang natawo ang bata so illegitimate ang akong anak busa karon nga nagpakasal na mi mausab ba ang iyang status gikan sa illegitimate ngadto na sa pagka legitimate? Unsa may maayo namong buhaton aron mausab ang iyang status? Daghang salamat. - Myra

Dear Myra,

Yes, tungod sa inyong pagpakasal na legitimated ang inyong anak apan dili kini automatic ug kinahanglan kining i-process. Basi sa atong balaod kun ang bata natawo nga illegitimate apan nagpakasal ra ang iyang mga ginikanan human sa iyang pagkatawo, mausab ang status sa bata gikan sa pagka illegitimate ngadto na sa pagka legitimated.

Ang maayo nimong buhaton karon mao ang pag-adto sa Local Civil Registrar diin marehistro ang imong anak ug mangayo ka og listahan sa mga dokumento nga angayan nimong i-submit kanila alang sa legitimation process sa imong anak.

Usa sa mga rekisitos niini mao ang Joint Affidavit of Legitimation, Affidavit of Acknowledgment, Marriage Certificate ninyo ug uban pa. Imong i-submit ang tanang requirements sa Local Civil Registrar aron ma process na ang legitimation sa imong anak, ug di ka na moagi pa sa korte. Ang Local Civil Registrar mo annotate sa birth certificate sa bata sa iyang legitimation ug ilang i-forward ang record sa PSA alang sa annotation sa PSA copy. Thank you and God Bless. - Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.