Nausik sa way hinungdang kawsa

Natugaw ang kalinaw sa probinsiya sa Bohol dihang mga boto sa armas milanog sulod sa kapin sa duha ka oras niadtong Biyernes sa buntag didto sa lungsod sa Bilar.

Segun sa report sa Police Regional Office-7, dunay nahitabong engkwentro tali sa hiniusang pwersa sa kapolisan ug militar batok sa mga rebeldeng sakop sa New People's Army didto sa Purok 2 (Matin-ao), Barangay Campagao.

Human sa sinukliay og mga bala nga nakaapekto sa daghang pamilya didto sa maong dapit, nakita ang nangligdas nga mga patay'ng lawas--lima niini ang giingong mga rebelde ug usa ang batan-ong sakop sa kapolisan.

Lakip sa napatay sa engkwentro ang giingong lider sa NPA nga si Domingo Compoc ug ang usa ka batan-ong abogada nga si Hanah Joy Cesista ingon man ang ilang mga kauban nga sila si Parlito Segovia alias Aldrin; Marlon Omosura alias Darwin; ug usa ka nailhan lang sa alias Juaning.

Sa habig sa gobiyerno patay ang polis nga si Corporal Gilbert Amper ug samaran ang laing usa ka polis.

Matud sa kapolisan nga ang ilang operasyon maylabot sa pagsilbi og arrest warrant sa mga rebelde nga dugay na nga gipangita tungod sa daghang kutay sa mga kaso nga ilang giatubang.

Si Compoc nga naila sab sa alias nga Silong giisip ni nga idlas ug maoy labing pinangitang kriminal sa Bohol.

Matud sa kapolisan siya maoy  lider sa kanhi Bohol Party Committee sa NPA. Kanhi tungod kay dugay ra kunong nabungkag ang guerilla front sa NPA didto sa Bohol. Gani dugay na ta nga wala kadungog og kalihukan sa mga rebelde sa maong lalawigan.

Kuwang hinuon ko sa pagtuo sa ilang pangangkon nga nabungkag na ang grupo sa maong mga rebelde kaniadto pa.

Gianugnan lang ko sa mga kinabuhi nga nausik sa wa nay hinungdan nga kawsa. Pananglitan ang batan-ong abogada nga si Cesista dako pa unta kaayo og kaugmaon ug tingali ikatampo sa kalamboan sa atong nasud.

Dunay kakuwangan ang atong gobiyerno apan dili ni igong rason aron mosagka sa bukid ug mohupot og armas pagpakigbatok sa kagamhanan.

Dili tubag ang paggunit ug armas ug pagmugna og kagubot tungod kay dunay mga ahensiya sa kagamhanan nga mahimong kadangpan pagtubag sa mga gumunhap sa kinabuhi.