Pagluok sa eskandalo
Pagsugod nako sa media, dunay tulo ka pari nga gipasanginlan nga nakalapas sa mga lagda sa Simbahang Katoliko:
• Pari sa Naga City sa habagatang Sugbo gitumbok nga nakabungkag og pamilya kay gika-relasyon ang babayeng manager sa bangko nga dakong minyo ug dunay mga anak (ang bana mismo ang nagpalaban namo);
• Pari sa Mandaue City nasakpan nga nipirma isip solemnizing officer sa iyang kaugalingon nga kasal; ug
• Pari gipalayas sa iyang congregation sa Estados Unidos kay nanglugos og batan-on nga mga lalaki pero gihatagan og importanteng puwesto sa Artsidyosesis sa Sugbo.
* * *
Sa matag kaso sa ibabaw dunay pari o obispo nga niduol namo aron sa pagpasabot nga di mi kapaabot og reaksiyon gikan sa kadagkoan sa artsidyosesis ug, kon tarung ming mga Katoliko tungod sa giya sa among mga ginikanan, di angay nga padak-on ang istorya aron nga di ma-eskandalo ang tibuok Simbahang Katoliko.
Dunay pipila ka sakop sa media nga nangahas sa pag-report sa mga kaso. Pero kasagaran naikog. Nakumbinser sa kabuotan sa mga nihangyo nila nga tugotan ang simbahan sa pagtul-id sa kasaypanan sa pribado nga mga paagi.
* * *
Wa pa ko sa media sa giingong pagpamaligya sa pari sa kabtangan sa simbahan sa Boljoon. Maong wa ko mahibawo kon kaikog ba say rason nganong wa matarung sa pagbalita. Pero sakop sa media nga isog nga nagsunod sa kontrobersiya nibutyag nga samang kultura sa pagpakahilom maoy nakapalaygay sa eskandalo.
May mga ebidensiya ang artsidyosesis sa pagpamaligya ug may mga pari ug layko nga nibarug sa ilang kasayuran sa pagpamaligya, maong napasakaan gyod og kaso ang gipasanginlang pari.
* * *
Pero sa pagsugod na sa husay, naproblema ang huwes nga natugpahan sa kaso. Kay ang mga pari ug mga layko nagdumili na sa paghatag sa ilang testimoniya. Wa na gani bisan usa nila nga nipakita sa korte. Ang rason? Nakatag-an ka, ang mga saksi unta sa prosekusyon nakumbinser sa kadagkoan sa artsidyosesis: Nga ang ilang pagpakahilom makapalingkawas sa simbahan gikan sa kauwawan.
Maong dul-an sa upat ka dekada human sa krimen niulbo pagbalik ang eskandalo. Kay napakyas ang kadagkoan sa simbahan, kana kon duna silay gihimo, sa pagtul-id sa kasaypanan sa naandan nga pribado nga mga paagi.
* * *
- Latest
