Dili nalang mag-promo kong mapakyas lang kay makatagam

Trending ang post sa usa ka nitezen nga naghulagway sa kasinatian niya ug sa iyang grupo nga traumatic dihang niadto sila sa TOPS nga bag-o lang giablihan og balik human sa rehabilitation ug pagpanindot pa sa naasoy'ng dapit nga gidayo karon sa mga local tourist ilabi na kadtong hilig magpabida sa social media nga dili magpauwahi sa trending.

Matud sa nag-post nga nagdahum sila nga adunay bus nga masakyan nila pauli kay mao man pud kini ang gipasiatab sa management base sa ilang promo nga bus ride sa kantidad nga P200 diin nag-antos ang mga tawo nga naglinya diha sa may IT Park aron lang makasaksi sa nabanhaw nga paraiso sa bukid.

Nahulog diay sa expectation versus reality ang grupo sa netizens kinsa nabalaka intawon unsay sakyan nila pabalik sa ilang gigikanan kay bukid ra ba gyud intawon ang ilang giadtoan ug nakaadlawonan na sila didto sa paghinuwat. Kada pangutana nila sa staff moingon ra man nga adunay bus nga masakyan nila pero dili pa segurado kanus-a mobalik.

Kining maong sitwasyon parehong adunay sayop ang duha ka habig. Una sa mga turista mora'g exaggerated ra ang paghulagway niya sa ilang sitwasyon nga "traumatic," gawas lang seguro og gipangmaltrato sila didto sa TOPS og dunay mga abat nga niatake nila. Sa sinugdanan pa lang kahibalo na sila sa posibleng mahitabo kay challenging naman gani ang pagsaka sa bukid kay nihit ang bus maong naglinya sila nganong nipadayon pa man sila.

Adunay mga factor nganong dugay nakabalik ang bus. Posibleng nalangan kini kay na-traffic or posibleng nitagpilaw gamay ang mga driver kay gikapoy ug aron safe pud ang ilang pagmaneho sa sakyanan kay delikado baya ang agianan.

Inay ma-stress gi-enjoy nalang unta nila ang overnight experience ug didto nalang magpaabot sa buntag sa ilang pagbalik sa ubos kay mas seguradong luwas ang iyang biyahe, inay sa mag rant sa social media. Hinuon katungod pud na nila nga ipabuhagay ang ilang kadismaya.

Sa management sa tourist attaction, tumanon pud unta ninyo ang inyong gipahambog nga promo nga nakadani sa mga tawo nga mobisita sa inyong dapit. Giseguro unta ninyo nga adunay igong bus nga masakyan ang mga tawo dili lang padung kon dili sa pagpauli, ayaw ninyo biya-i intawon sa eri ang mga turista. Ayaw nalang mo pagpatuga og promo kong dili matuman kay makatagam sa mga tawo nga moanha diha.

Ang dapit nga nindot ug labaw na ang batasan sa nag-manage bisan walay promotional event, dugokon gyud na sa mga tawo sa kaugalingon nila nga sakyanan ug kabubot-on nga moadto. Unsaon man ang promo kon mapakyas lang nga mosangpot na hinuon sa pagkatagam sa mga tawo.