NMP nakalapas sa balaod
Wa unta dawata dayon ni Director-General Jeremy Barns sa National Museum of the Philippines (NMP) ang donasyon sa magtiayong Edwin ug Aileen Bautista sa way pagtuman sa iyang trabaho sa pag-certify nga ang mga butang wa makuha sa ilegal nga paagi.
Ang iyang obligasyon di sugyot lang. Kon dili sugo gyod sa Republic Act No. 11333, o National Museum of the Philippines Act. Segun sa kolumnista sa The Freeman nga si Atty. Ian Manticajon ang Section 22 sa balaod nag-detalye sa mga lakang pagseguro sa legalidad sa kabtangan sa NMP.
* * *
Makahimo lang si Barns sa certification nga way balaod nga nalapas ang donasyon sa mga Bautista kon:
• Iyang gihangyo ang mga Bautista sa paghatag sa mga dokumento nga mamatuod giunsa nila sa pagpanag-iya ang karaan nga mga imahen sa mga Santos sa simbahan sa Boljoon; ug
• Iyang gipangutana ang Cebu Archdiocese, nga gipangulohan ni Arsobispo Jose Palma, o ang kaparian sa Archdiocesan Shrine ni Patrocinio de Maria Santisima sa Boljoon nga gipangulohan ni Msgr. Arthur Navales, unsa ang mga sirkumstansiya sa pagpagawas sa mga imahen gikan sa simbahan.
* * *
Kon gituman pa lang unta ni Barns ang iyang trabaho, mas sayo unta niyang:
• Mahibaw-an nga gikawat diay ang mga imahen gikan sa simbahan kapin sa tulo na ka dekada ang nilabay ug nga nagbangotan ug dugay nang nangandoy ang mga parokyano nga mahibalik ang mga imahen sa pulpito sa ilang simbahan; ug
• Magiyahan ang mga Bautista pagsubay sa kinatibuk-ang ruta sa mga imahen sa wa pa moabot nila aron mailhan ug masilotan ang mga responsable sa krimen.
* * *
Kon di pa inila sa taas nga katilingban ang mga Bautista (si Edwin presidente ug chief executive officer sa UnionBank, samtang si Aileen professor sa De La Salle – College of St. Benilde ug sa Asia Pacific College), mahimong wa maikog si Barns pagtuman sa balaod.
Pero di pa uwahi ang tanan. Masalbar pa niya ang NMP gikan sa kauwawan pinaagi sa pag-uli sa mga imahen ngadto sa Boljoon (sa way pagdemanda og “sharing” sa pagpanag-iya ug pagpagawal nga silay labing takos nga mopreserbar sa mga imahen) ug pagtugyan ngadto sa mga Bautista sa tahas pagpanalipod sa ilang kaugalingon.
* * *
- Latest
