Ang Sanla

Pebrero  2024: Ikaunom nga Domingo sulod sa tuig (World Day of the Sick)

Mga Pagbasa: Lv. 13;1-2, 44-46/Sal. 36/1 Cor. 10;31-11;1/Mk. 1;40-45

Maayong Balita

Ang sakit nga sanla dili lang isyu kalabot sa sakit sa panit kondili naglambigit kini og mga isyu kalabot sa relihiyon ilabina mahitungod sa mga balaod kalabot sa pagpanglinis.

Kaniadto ang si bisan kinsang sanlahon kinahanglang maglakaw nga magdala og kampanilya magsul-ob og gision nga sapot.

Dungan ang pagpadunghay sa buhok. Inig sulod niya sa katilingban mosinggit siya: “Mahugaw Ako! Mahugaw ako!

Pasidaan kini sa katilingban nga niabot na ang sanlahon aron sila nga nakadungog makapangandam ug makapahilayo.

Apan lahi ang atong Ginoo, imbis mopahilayo iyang gimbut-an nga mamaayo ang sanlahon. Iya siyang gihikap ug gibalik sa katilingban diin siya nahimulag gumikan sa iyang sakit.

Kasinatian

Kitang mga tawo kusog kaayo mokilatis kun kinsay mahimong dawaton ug kinsay kinahanglang likayan. Ang sanla dili lang mahitungod sa sakit sa panit.

Adunay mga tawo nga dili nato buot kuyogan ug ubanan. Dili kita buot nga makigharong kanila tungod kay giisip man nato silang mahugaw labina kun maghisgot kita og sukaranan sa moralidad.

Apan wala kini magpasabot og pagdawat ni bisan kinsa nga hawa sa tinguha sa pagbag-o. Ato silang himamaton apan sa laing bahin ato silang dasigon aron mamahimong bag-o ug tiunay atubangan sa Dios ug sa mga tawo.

Lihok

Atong paningkamotan nga dili kita mamahimong mahukmanon ngadto sa uban apan sa  laing bahin sugo sa inigsuon nga gugma atong tabangan ang atong isigkaingon nga mamahimong mahiuyon sa kasugoang Diosnon.

Pangamuyo

Tanan: Hugaw ako Ginoo busa limpiyohi ako pinaagi sa imong grasya.